Биринчи лига. "Цементчи" - "Андижон". ПРЕВЬЮ

Эртага биринчи лиганинг 6-тур ўйинлари бўлиб ўтади. Мухлисларни шубҳасиз “Цементчи” – “Андижон” учрашуви катта ҳаяжон остида ушлаб турибди десак муболаға бўлмайди. Боиси олий лигага чиқиш учун кураш олиб бораётган ушбу икки жамоа ўртасидаги баҳс кескин ва муросасиз ўтиши тайин. Қувасойликлар ҳозиргача 5та ўйин ўтказиб, 100 фоизли натижа қайд этишган бўлса “бургутлар” чемпионатнинг биринчи турида сафарда “Ғаллакор” билан дуранг қайд этгани айни дамда пешқадам билан 2 очко фарқни келтириб чиқармоқда. Шунинг учун эртанги баҳсда Виталий Легай шогирдлари қандай бўлмасин Қувасойда мезбонларни таслим этиб, пешқадамга айланиб олишни ўйламоқда, дея клуб матбуот хизмати хабар бермоқда.

Лекин Абдумалик Ҳакимов бошқарувидаги “Цементчи” ҳам ўз майдонида осонликча очко улашмайди. Шундай экан чоршанба куни мухлислар ҳақиқий “жанг”га гувоҳ бўлади. Ҳар холда ҳар икки жамоа футболчилари ҳам турнинг марказий ўйинига астойдил ҳозирлик кўраётганини билдирмоқда. 

“Цементчи” эртанги рақиби “Андижон” билан шу кунгача икки марта 2003 йили олий лигада тўқнаш келган. Жамоаларнинг дастлабки учрашуви Қувасойда бўлган. Унда мезбонлар 2:1 ҳисобида ғалаба қозонганди. Иккинчи даврадаги баҳсда эса андижонликлар йирик – 4:0 ҳисобида муваффақият га эришган. 
Ўйлаймизки, ўша учрашувлардаги таркиб ишқибозларни қизиқтирмасдан қолмайди. Шундай экан тарихга назар ташлаймиз. 

13.04.2003 йил
Олий лига 4-тур
“Цементчи” – “Андижон” 2:1 (0:0)
Қувасой. “Цементчи” стадиони 5000 томошабин. 
Ҳакам: Ғайрат Каримов, 8,6.
Голлар: Сейран Гафаров, 74 – 0:1. Тимур Ҳамидов, 78 – 1:1. Тимур Ҳамидов, 82 – 2:1.
“Цементчи”: Андрей Бакланов, Тимур Ҳамидов, Лутфулло Ҳайдаров, Эркин Аҳмедов (Ғайрат Раимжонов, 89), Азиз Мамажонов ( Игорь Буров, 55), Суҳроб Солоҳитдинов, Абдумалик Ҳакимов, Олег Буров, Альфред Зокиров, Денис Копадзе (Ёдгор Акбаров, 70), Мурод Исмоилов.
“Андижон”: Қобилжон Олимжонов, Шерзод Шарипов, Андрей Захаров (Нурали Нуруллаев, 76), Рустам Қурбонбоев, Игорь Кичигин, Павел Зотов, Афзал Азизов, Сейран Гафаров, Асқар Жадигеров (Санжар Асқаралиев, 24), Фарид Хабибуллин, Ильнур Хазигалиев (Станислав Борисенко, 64).
Огоҳлантиришлар: Ильнур Хазигалиев, 16. Эркин Аҳмедов, 30. Фарид Хабибуллин, 70. Андрей Бакланов, 86.

17.10.2003 йил
Олий лига 27-тур
“Андижон” – “Цементчи” 4:0 (1:0).
Андижон. “Наврўз” стадиони 7000 томошабин.
Ҳакам: Арслон Ҳотамов, 8,4.
Голлар: Бахтиёр Ҳамидуллаев, 32. Рустам Қурбонбоев, 57. Вадим Котельников, 65. Бахтиёр Ҳамидуллаев, 67. 
“Андижон”: Борис Белошапка, Шерзод Шарипов, Маъруф Пўлатов (Павел Зотов, 77), Рустам Қурбонбоев, Афзал Азизов, Сейран Гафаров, Бахтиёр Ҳамидуллаев, Вадим Котельников, Ильнур Хазигалиев (Станислав Борисенко, 83), Қаҳрамон Абдуқодиров (Исроил Турсунов, 58), Санжар Асқаралиев. 
“Цементчи”: Ғайрат Ҳасанов, Ғайрат Раимжонов, Лутфулло Ҳайдаров, Илҳом Зайлобиддинов, Эркин Аҳмедов, Суҳроб Солоҳитдинов, Абдумалик Ҳакимов, Арслон Толипов (Денис Копадзе, 29), Альфред Зокиров (Сергей Радкевич, 77), Мурод Исмоилов, Якуб Меметов (Олег Буров, 46). 
Огоҳлантириш: Ильнур Хазигалиев, 82.     

Таркибга эътибор қаратган бўлсангиз мазкур учрашувларда Санжар Асқаралиев “Андижон” сафида харакат қилганини кўрамиз. Орадан 14 йил ўтиб уни яна андижонликлар сафида “Цементчи”га қарши ўйнашини ким ҳам ўйлабди дейсиз. 

Бундан ташқари “Цементчи” таркибида  харакат қилган Абдумалик Ҳакимовнинг орадан шунча вақт ўтиб, жамоа бош мураббийи сифатида ишлаши ҳам эътиборга моликдир. 
Эски рақибларнинг янги тўқнашуви эртага Қувасойдаги “Цементчи” стадионида соат 16:30да бошланади.