Биринчи лига. "Хоразм" ўз таркибини кучайтирмоқда

Биринчи лига қатнашчиси Урганчнинг “Хоразм” жамоаси ўткан ҳафтанинг сўнгги кунларида Тошкентда навбатдаги йитғинга киришди. Аввал хабар берганимиздек, жамоада янги бош мураббий Александр Ежов иш бошлаган. Гарчи янги мураббийнинг ўзи машғулотларни ўтказаётган бўлсада, раҳбарият билан расман бир қарорга келмаган. Унинг тақдири яқин 2-3 кун ичида тўлиқ хал бўлишини Ежовнинг ўзи айтиб ўтди.  

Жамоа айни дамда Тошкентда “Геофизика” қароргоҳида истиқомат қилмоқда. Айтишларича “Хоразм” Ўзбекистон Кубогидан ўрин олган “Навбаҳор”га қарши кечадиган баҳсига қадар (24-25 март) пойтахтда бўлади. Шу вақт оралиғида мураббийлар бир нечта синов-назорат учрашувларини ташкил этиб, футболчиларни кўрикдан ўтказади.  
Таркибдаги ўзгаришларга келадиган бўлсак, ўткан мавсумни “Олмалиқ”да якунлаган тажрибали ҳимоячи Айбек Нурбоев, “Цементчи”нинг собиқ ҳужумчисига айланган Нурлибек Таласбоев айни дамда урганчликлар йиғинида иштирок этмоқда. Ушбу қорақалпоғистонлик футболчилар ҳозирча кўрикдан ўтмоқда. Яқин кунларда уларнинг сафига “Андижон”нинг собиқ футболчиси Азамат Бобожоновнинг ҳам келиб қўшилиши кутилмоқда. Булардан ташқари яна айим ўйинчилар билан музокара олиб борилмоқда.