"Бунёдкор"нинг собиқ устози Англия чемпионатида иш бошлаши мумкин

Тошкентнинг “Бунёдкор” клуби собиқ бош мураббийи, бразилиялик машҳур мутахассис Луис Фелипе Сколари тез орада Англия премьер-лигасида иш бошлаши мумкин.

“Менга АПЛ жудаям ёқади. Ушбу чемпионатни доимо кузатиб боришга ҳаракат қиламан. Айтишим мумкинки катта эҳтимол билан янги мавсумни туманли альбионда бошлайман. Бироқ, премьер-лигада эмас Чемпионшипда. Чунки айнан ушбу дивизион жамоасидан менга таклиф бўлмоқда ва айни дамда музокаралар ўтказяпмиз. Таъкидлашим лозимки, ушбу клуб айни дамда АПЛда ўйнамоқда. Лекин, катта эҳтимол билан улар бу мавсум кучлилар сафини тарк этишади.

Менга БАА ва Хитойдан таклифлар бўлмоқда. Аммо, Англия барибир бошқа. Мен учун Чемпионшипда ишлаш муаммо туғдирмайди. Гарчи, у Англиянинг иккинчи дивизиони ҳисоблансада, даражаси қолган 45та мамлакатнинг Олий лигаси билан тенг”, - дейди Сколари.

Айтиш лозимки, Сколари айни дамда “Вест Бромвич” билан музокаралар олиб бормоқда.

Эслатиб ўтамиз, Сколарининг сўнгги иш жойи Хитойнинг "Гуанжоу Эвергранд" клуби бўлган эди.