Денис Истоминнинг йўлидан бораётган гўзал теннисчимиз шов-шувли натижа қайд этди
Халқаро миқёсдаги мусобақаларда жаҳон рейтингида ўзидан юқори ўринда турган теннисчиларни мағлубиятга учратиш ўзбекистонлик ракетка усталарининг ёқимли анъанасига айланиб бормоқда. Австралия очиқ чемпионатида ҳамюртимиз Денис Истомин жаҳоннинг иккинчи рақамли теннисчиси Новак Жокович ва 31-рақамли ракетка устаси Пабло Карреньо-Бустани мағлуб этиб, мухлисларимизни хушнуд этганди.
Энди истеъдодли ёш спортчимиз Арина Фольц аёллар ўртасидаги халқаро турнирда сараланган теннисчи устидан иродали ғалабага эришди. Қозоғистонда ўтказилаётган мусобақанинг дастлабки даврасида Арина учинчи рақамда сараланган австриялик Пиа Конигга қарши кортга чиқди.
Европалик теннисчи илк сетни 6:2 ҳисобида ўз фойдасига ҳал қилди. Бу сетда чъжиддий қаршиликка дуч келмаган Пиа осон ғалабани кўзлаган эди. Бироқ, Арина Фольц кейинги икки сетда ўта кучли ўйин намойиш қилди ва 7:5, 7:5 ҳисобида зафар қучди. Ўйин 2 соату 36 дақиқа давом этди.
Арина кейинги даврада япониялик Акари Иноуэга қарши кортга чиқади.
Комментарии