Дибала илк бор хет-трик қайд этди

Бундан бироз олдин Италиянинг Генуя шаҳридаги “Луиджи Феррарис” стадионида Италия А Серияси 2-туридан ўрин олган “Женоа” хамда “Ювентус” жамоалари ўртасидаги баҳс ўз ниҳоясига етди.

Учрашувда ҳисобни мезбонлар очиб, хатто 2:0 ҳисобида олдинда борганига қарамай, якунда туринлик футболчилар ўз иродаларини намойиш этган холда, ҳисобни 4:2 кўринишига келтира олишди.

Эътиборлиси, “Ювентус”нинг 4 голидан 3 тасига Пауло Дибала муаллифлик қилди. Аргентиналик форвард даставвал 14-дақиқада ҳисобни қисқартирди, биринчи бўлим сўнггида эса пенальтидан гол киритиб, мувозанатни тиклади.

Учрашувга ҳакам томонидан қўшиб берилган дақиқаларда эса ушбу беллашувда ўзининг учинчи, “Ювентус” тўртинчи голини киритди ва ўйинга “нуқта қўйди”.

Қайд этиш жоиз, 23 ёшли футболчи А Серияда илк бор хет-трик қайд этди. Унинг киритган сўнгги голи эса Италия чемпионатидаги 50-голи бўлди.