Дунёнинг энг томошабоп чемпионатлари (Топ-10)

7 январь, 20:40 1260

Дунёнинг энг томошабоп чемпионатлари (Топ-10)

Спорт томошалари ҳар доим мухлислар учун энг завқли кўнгил очиш воситаси бўлиб келган. Шу асосда sportingintelligence нашри бутун дунёдаги энг оммабоп спорт турларини таҳлил қилди.  

Нашрда таҳлил этилган ушбу кўрсаткичлар ўтган мавсумдаги рақамларга асосланиб, топ-10 талик рейтинг шаклида ташкил этилди.

 Демак, дунёдаги энг оммабоп спорт лигалари билан танишинг:

10. CFL (Канада футбол лигаси – Канада футболи)

Канада футболи –Америка футболи турларидан бири. Ўз минтақасида CFL номи билан машҳур ушбу лига ўтган мавсум давомида ўтказилган 81 баҳсда 24 692 томошабин йиғишга муваффақ бўлган.

9. Liga MX (Мексика чепмионати Олий дивизиони – футбол)

Мексика чемпионати биз учун у қадар таниш чемпионатлардан эмаслиги барчамизга аён аммо, бу Марказий Америка вакилларининг футболга бўлган қизиқишлари паст эканлигини англатмайди.

Фикримизни далиллаш учун эса қуйидаги рақамларга эътиборинингизни қаратган бўлардик. Ўтган йилда ўтказилган  Liga MX баҳсларида 306 та ўйин ташкил эитлган бўлса, ҳар бир баҳсни ўртача 26 151 нафар мухлис бевосита стадиондан кузатиб борган. Ажойиб, тўғрими?

8. La Liga (Испания чемпионати – футбол)

Бугунги кунда “Эл-классико” учрашувлари ҳақида билмайдиган ва Испания Премьераси учрашувларига қизиқиш билан қарамайдиган мухлиснинг ўзи топилмаса керак.

Дунёнинг энг кучли футболчилари жам бўлган ушбу мусобақа томошабоплик бобида кутилганидек самарадорлик қайд этганича йўқ. Ажабки, 2015/16 мавсум давомида ўтказилган Испания клублари 380 та учрашувда майдонга тушиб, мухлислар бўйича ўртача 28 191 нафарлик кўрсаткич қайд этди.

Бу билан улар рейтинг жадвалида 8 ўринни банд этди. Бироз ноодатий ўрин аммо, наилож, рақамлар алдашни билмайди.

7. BBL (Big Bash League, Австралия крикет лигаси)

Крикет барчамизга Ҳиндистондаги энг оммавий спорт турларидан бири сифатида машҳур. Аммо ушбу машҳурлик дунё миқёсида олиб қаралганда австралияликларнинг соясида қолиб кетаётгандек тасаввур уйғотади. Австралия крикет лигаси айни фикримизга асос бўлади.

Бу борада фактларга таянадиган бўлсак, ўтган мавсумда BBL яъни Big Bash League доирасида жами 32 та ўйин ташкил этилган бўлса, ушбу ўрашувларнинг ҳар бирига ўртача 28 249 нафар мухлис ташриф буюрган.

6. (NPL Nippon Professional Baseball, Япония бейсбол лигаси)

Кунчиқар юрт вакиллари Осиёда футбол, дзюдо каби спорт йўналишлари бўйича етакчилик қилади.

Аммо, Япония бейбол лигасининг ўтган мавсум кўрсаткичларига кўра, ушбу рейингдан ўрин олиши кунчиқар юрт вакилларининг бейсболга бўлган қизиқишларининг анча юқори эканлигидан далолат бермоқда.

Энди рақамларга эътибор қаратинг. Япония бейсбол лигаси доирасида жами 858 та ўйин ташкил этилган бўлса, ушбу баҳсларни ўртача 29 116 нафар мухлис бевосита стадиондан туриб кузатган.

5. MLB (АҚШ ва Канада бош лигаси – бейсбол)

Умумий жиҳатдан олиб қараганда MLB 2016 йилги мавсумда мухлисларни жалб этиш борасида жуда катта муваффақиятга эришди.

Ўтган йилда ташкил этилган баҳсларни бевосита стадиондан кузатган мухлислар сони умумий 73 миллион (!)ни ташкил этди. Бу рақамни агарда, ўйинларга нисбатан кўрсаткичларини олиб қарайдиган бўлсак, ҳар бир ўйинга ўртача 30 131 нафар мухлис ташриф буюргани аён бўлади.

 

4. AFL (Австралия футболи лигаси)

Австралия футболи лигаси – ушбу атамани Австралия футбол лигаси билан адаштириб юбориш мумкин. Аммо, Австралия футболи бу америка футболига ўхшаш спорт тури ҳисобланади. Аммо, баъзи жиҳатлари билан ўзаро фарқланади.

Кўриниб турибдики, “кенгрулар юрти”да футболга қараганда, австралия футболи кўпроқ оммалашган. Буни бевосита қуйидаги рақамлардан ҳам кўриб чиқишимиз мумкин.

Ўтган мавсумда AFL яъни Австралия футболи лигасида 198 та ўйин ўтказилган бўлса, ушбу баҳсларни ўртача 31 878 нафар мухлис стадиондан кузатган. Бу албатта, кичик кўрсаткич эмас.

3. АПЛ (Англия премьер лигаси – футбол)

Англия Премьер Лигаси дунёдаги энг томошабоп лига деб ҳисобловчи мухлислар орамизда йўқ эмас, ҳатто, уларнинг аксарияти бу борада исталган киши билан баҳслашиши ҳам, табиий.

Аммо, рақамларга эътибор қаратадиган бўлсак, ўтган мавсумда ташкил этилган жами 380 та ўйинда ўртача 36 452 томошабин кузатган. Ажойиб кўрсаткич аммо, бу дунёнинг мутлақ энг томошабоп лигасига айланиш учун етарли эмас.

2. Бундеслига (Германия чемпионати – футбол)

Германия Бундеслигаси баҳсларида АПЛ га қараганда ўйин 74 тага ташкил этилади. Бунинг сабаби эса, албатта, Германия олий дивизионидаги жамаоларнинг 20 та эмас, 18 та эканлиги билан боғлиқ.

Аммо, шундай бўлсада, ўтган мавсум кўрсаткичларига қараганда, Бундеслига доирасида ташкил этилган 306 та ўйинни ўртача 42 421 нафар мухлис кузатиб борган бу эса АПЛ мухлисларидан 5969 тага кўп деганидир.

1. NFL (Миллий футбол лигаси – америка футболи)

Америка футболи ҳақиқатда, дунёнинг энг оммабоп чемпионатдир. Бунинг энг асосий сабаби, ушбу спорт турининг АҚШда ўта юқори даражада оммалашиб кетгани билан боғлиқ.

Энди бевосита рақамларга мурожаат қиламиз. 256 ўйинда ўртача 69 487 томошабин; изоҳга хожат бўлмаса керак.