Истомин 2001 йилдаги авто ҳалокат сабаб теннис ўйнай олмаслиги айтилган эди, бироқ …

Австралия очиқ чемпионатининг иккинчи босқич доирасида жаҳоннинг иккинчи рақамли теннисчиси Новак Жоковични беш соат давом этган баҳсда мағлуб этган ҳамюртимиз Денис Истомин бутун дунё теннис ихлосмандларини олқишига сазовор бўлди.

Йилнинг дастлабки сенсациясини амалга оширган Истомин, аслида 2001 йилги авто ҳалокат сабаб теннисдан батамом хайрлашиши керак эди. 14 ёшли ёшли кичик Истоминнинг оёғи жиддий жароҳатланади. Натижада шифокорлар жарроҳлик амалиёти билан унинг оёғи «80 чок тикилади» (жарроҳлар тили билан айтилганда) ва келажакда теннис билан умуман шуғулланмаслиги ҳақида жиддий огоҳлантирилади.

Бироқ унинг ҳам онаси, ҳам мураббийи ҳисобланган Клаудия Истомин ўз ўғлини яна кортга қайтиши учун тинмай ҳаракат қилади. Икки йиллик тинимсиз интилишлардан сўнг Денис Истомин кортга қайтади.

Шунинг учун ҳам Денис Австралия очиқ чемпионатидаги амалдаги чемпион Новак Жоковични мағлуб этгач, қисқа интервью чоғида биринчи навбатда онасидан чексиз миннатдор эканлигини билдириб ўтди.