"Локомотив"ни кутиб турган "Зенит" Уммон клуби дарвозасига 14та тўп йўллади

Санкт-Петербургнинг "Зенит" клуби айни дамда БААнинг Дубай шаҳрида мавсумнинг иккинчи ярмига тайёргарлик кўрмоқда. Питерликлар кеча ҳамюртимиз Анзур Исмоилов тўп сурадиган Хитойнинг "Чангчун Ятай" клубига қарши  назорат учрашувини ўтказишган ва ўйиннинг дастлабки дақиқаларида Ўзбекистон миллий терма жамоаси ҳимоячиси "Зенит" дарвозасини ишғол этишга муваффақ бўлган эди.
Бугун россиялик футболчилар Уммоннинг "Сохара" жамоасига қарши ўртоқлик ўйинини ўтказишди. Учрашув кутилганидек рус грандининг тўлиқ назорати остида кечди. Уммонлик футболчилар ўйин якунига қадар ўз дарвозаларидан оз эмас, кўп эмас, нақд 14та тўп олиб чиқишди ва бор йўғи бир маротаба гол кирита олишди. Якуний ҳисоб 14:1. 

Эслатиб ўтамиз, "Зенит" шунингдек мамлакатимизнинг амалдаги чемпиони ҳисобланган Тошкентнинг "Локомотив" клуби бидан ҳам назорат ўйини ўтказишни режалаштирган.