Малайзия клуби Шавкат Саломов билан шартнома имзоламайди

Аввал хабар берганимиздек, ўтган мавсумни «Бухоро» сафида ҳаракат қилган Шавкат Саломов Малайзия Супер лигаси вакили «Т-Тим» кўригидан ўтаётган эди.

Жамоа бош мураббийи Раҳмад Дармаван жароҳати сабаб бу мавсумни ўтказиб юборадиган жамоанинг малилик футболчиси Макан Конате ўрнига, Ўзбекистон терма жамоасининг собиқ аъзоси Шовкат Саломов ҳамда “Марсел” клубидаги фаолияти билан мухлисларга таниш бўлган Мамадоу Самассани «Т-Тим» машғулотларига жалб этган эди.

Бироз аввал, SPORTS.uz ахборот порталига хабар берган малайзиялик мустақил журналистнинг сўзларига кўра, «Т-Тим» клуби Шавкат Саломов билан эмас балки Мамадоу Самасса билан шартнома имзолайди. Жамоанинг ёрдамчи мураббийи юқоридаги қарорни қуйидагича изоҳлаган.

- Шавкат Саломов ҳам Макан Конате ўрнига муносиб даъвогар эди. Бироқ у фақатгина ҳужумкор ярим ҳимоячи сифатида яхши таассурот қолдирди холос. Аввал ҳам таъкидлаганимиздек жамоадаги молиявий қийинчиликлар сабаб, клубимизга ҳам ярим ҳимояда, ҳам ҳужумда бирдек ўйнай оладиган футболчи зарур эди. Шу сабабли Мамадоу Самассани таркибда олиб қолишга қарор қилдик, дейди – «Т-Тим» ёрдамчи мураббийи Моҳд Азҳари Салим.

Бу хабарни бизга маълум қилган манбадан фарқли ўлароқ, "Т-Тим” жамоаси Шавкат Саломов билан шартнома имзоламаслиги ҳақида расмий маълумот бермаган.