“Olmaliq” nazorat o‘yinida Ukraina klubiga mag‘lub bo‘ldi
Xabaringiz bor “Olmaliq” klubi o‘zining dastlabki xorij yig‘inini Turkiyaning Antaliya shahrida o‘tkazmoqda. Jamoa bugun uchinchi o‘rtoqlik o‘yinini o‘tkazdi.
Ukrainaning “Karpati” jamoasiga qarshi kechgan bahsda “Olmaliq” Antaliyadagi g‘alabali seriyasini davom ettira olmadi. Bu o‘yinda avvalgi tarkibga nisbatan bir qator o‘zgarishlar amalga oshirildi.
Bir necha futbolchi boshqa ampluada sinab ko‘rildi. Bu esa o‘yin strategiyasiga ma’lum o‘zgarishlar olib keldi. Keskin va shiddatli tarzda o‘tgan bahsda olmaliqliklar biroz qo‘pol o‘yin namoyish etishdi. O‘yinni boshqarib borgan hakam ham ko‘p vaziyatlarda raqib foydasiga qaror chiqarishi ham bunga sabab bo‘ldi, deyish mumkin.
Bevosita o‘yinga to‘xtaladigan bo‘lsak, uchrashuvning 33-daqiqada zaxiradan maydonga tushganiga ko‘p bo‘lmagan raqibning argentinalik hujumchisi Konte hisobni ochdi. Ikkinchi taymni faolroq boshlagan “Olmaliq” futbolchilari 62-daqiqada hisobni tenglashtirishga muvaffaq bo‘lishdi. Gol muallifi Momchilo Dulovich bo‘ldi.
Raqibning ilk hujumi esa yana hisobni o‘zgartirib yubordi. Vladislav Kasminin kutilmaganda o‘z darvozasini ishg‘ol etdi. 67-daqiqada jarima maydoni ichida Shavkat Mullajonov qo‘pollik ishlatgan deb topildi va darvozamiz tomon penalti belgilandi. Bundan raqib futbolchisi Chachua unumli foydalanib hisobni 1:3ga etkazdi. Qolgan daqiqalarda darvozalarga boshqa to‘p kiritilmadi.
Kichik jarohat sabab Zabihillo O‘rinboev bu o‘yinda maydonga tushmadi. Igor Yelich esa kecha o‘z yurtiga jo‘nab ketgandi. U jamoaning navbatdagi yig‘inida ham ishtirok etadi.
O‘rtoqlik uchrashuvi. 24 yanvar
“Top kape” sport majmuasi. Antaliya
“Olmaliq” – “Karpati” 1:3
Gollar: Momchilo Dulovich 62 – Konte 33, Vladislav Kasminin 63 avtogol, Chachua 67 penalti.
Chetlatish: Shavkat Mullajonov 67 (ikkinchi ogohlantirish)
“Olmaliq”: Xurshid Xodjaev, Islom Inomov, Shavkat Mullajonov, Vladislav Kasminin, Momchilo Dulovich, Xurshid Muxtorov, Shohnazar Norbekov, Dilshod Jo‘raev, G‘ulom-Haydar G‘ulomov, Alibobo Rahmatullaev, Altimurot Annadurdiev.
Zaxiradan maydonga tushganlar: Rahmatillo Berdimurodov, Muhammad Isaev, Doniyor Usmonov, Viktor Klishin.
Fikrlar