Қудратилло айёр рақибини супержангнинг биринчи раундида нокаут қилди
Сингапурдаги "OCBC Arena" спорт мажмуасида ташкил этиладиган профессионал бокс кечасида енгилмас нокаутчи - Қудратилло Абдуқаҳҳоров (10-0-0, 7 КО) фаолиятларидаги энг муҳим учрашувда зимбабвелик Африка чемпиони Чарльз Манючига қарши рингга кўтарилди.
12 раундлик жангда Қудратилло Абдуқаҳҳоров Чарльз Манючи (20-2-1, 12 КО) эгаллаб турган WBC Silver – кумуш камарига даъвогарлик қилди.
Ўзбек боксчисининг бу галги рақиби ҳақиқатан жуда кучли эди. Манючи ўта тезкор, чидамли ва кучли зарбага эга боксчи сифатида танилганидан ташқари, рингда айёрлиги ва яширинча тақиқланган зарбаларни амалга ошириши билан ном чиқарган.
Бироқ, унинг бу устунликлари Қудратиллога қарши жангда иш бермади. Ўзбек йигити 12 рандлик жангнинг биринчи раунд учинчи дақиқаси ўтиб бораётган бир паллада кучли зарбалари билан Чарльз Манючини ер тишлатди. Зимбабвелик боксчи фаолияти давомида илк маротаба нокаут бўлди.
Қудратилло рақибига тегишли бўлган WBC Silver – кумуш камарини ўзиники қилди.
- Бу ғалабамни менга ишонган ва қўллаб-қувватлаб турган ота-онам, устозларим ва мухлисларимга бағишлайман, - деди Қудратилло Абдуқаҳҳоров SPORTS.uz ахборот порталига. - Насиб қилса, кейинги жангларимда ҳам ўзбекистонлик бокс ишқибозларини ўз ғалабам билан хурсанд қиламан. Ҳаммага раҳмат!
Қудратилло Абдуқаҳҳоров профессионал рингда кетма-кет ўн биринчи ғалабасини нишонлади. Фаолияти давомида қўлга киритган Ўзбекистон чемпионлиги, WBF International - халқаро чемпионлик ва WBC Asian Boxing Council Silver - Осиё чемпионлиги кумуш камарлари қаторига яна бир нуфузли соврин WBC Silver – кумуш камарини қўшиб қўйди.
Фикрлар