“Суғур куни”

Суғур куни – АҚШ ва Канадада нишонланадиган миллий байрам. Шу куни инидан чиқадиган суғурнинг хулқига эътибор қаратиш одатга айланган. Агар кун булутли бўлиб, суғур ўз соясини кўрмаса, қиш тез орада тугайди, деб ҳисобланилади. Бош рольни актёр Билл Мюррей ижро этган “Суғур куни” филмида эса байрамнинг қайтарилавериши ҳақида ҳикоя қилинади. Филм қаҳрамони ҳар куни 2 февральда уйғонаверади. Футбол оламида ҳам юқоридаги кино ссенарийси каби ҳар куни бўлмасада, ҳар йили қайтариладиган вазиятлар етарлича топилади. Қуйида айнан шу ҳақида ҳикоя этамиз.

Баҳодир Насимовнинг янги жамоаси ҳақида нималарни биласиз?

“Чучвара йўғ-е ўртоқлик ўйини отмен”

Сўнгги йилларда Ўзбекистон терма жамоасининг ўртоқлик ўйинлари бекор қилинаётган ҳолатлар табиий холга айланмоқда. Жумладан сўнгги 4 йил ичида 6 та ўртоқлик ўйини бекор қилинган. Албатта, бунинг ўзига хос сабаблари бор. Жумладан ўртоқдик ўйини бўлиши лозим бўлган мамлакатдаги нотинчлик ёки об-ҳавонинг ноқулай келиши каби сабабларни келтириб ўтишимиз мумкин. Агарда, эртага Ўзбекистон миллий терма жамоасининг ўртоқлик ўйини қолдирилди деган хабар чиқса, мухлислар бундан сира ҳам ажабланишмасликлари аниқ.

Абадий тўртинчи – “Арсенал”

“Мен – тўртинчи”. Лондоннинг “Арсенал” клуби ҳақида шундай кино олиш мумкин. Чунки, сўнгги 10 йил ичида “тўпчилар” мавсум сўнггида маррага тўртинчи бўлиб етиб келган вазият оз эмас, кўп эмас 6 бор такрорланди. Жумладан доимо кучлилар сафида зикр этиладиган “Арсенал” сўнгги 12 йил ичида бирор марта мамлакат чемпионлигини қўлга киритмаганини айтиш жоиз.

Игорь Акинфеев ЕЧЛда “тешик”

Россиялик маҳоратли дарвозабон қанчалик яхши ўйин намойиш этмасин, мана ЕЧЛда 43 та ўйиндирки, мунтазам дарвозасидан тўп ўтказиб келади ва бу борада мутлақ антирекордчи саналади.

Англия термасининг катта турнирлардаги омадсизликлари

Дунёдаги энг кучли лига. Дунёдаги энг машхур лига, энг томошабоп лига, энг бой лига бу – АПЛ. Аниқроғи Англия десак, ҳам бўлаверади. Инглизлар доимо ўз севимлиларидан юқори натижалар кутишга одатланишган. Бироқ гап терма жамоа ҳақида кетганда… Англия ҳар доим фаворитлар қаторида зикр этилсада, мана 50 йилдан ошдики, хамон катта турнирларда зафар қуча олаётгани йўқ.

Месси ва Роналдунинг “Олтин тўп”лари

Мана 9 йилдирки, “Олтин тўп”ни ёки Месси  бўлмаса, Роналду қўлга киритиб келади. Афтидан бунга барча кўникиб улгурди ва яқин йилларда ҳам бу ўзига хос бўлган “анъана” барҳам топиши амри-маҳол.

Ўзбекистон терма жамоасининг ЖЧ саралашларидаги омадсизликлари

Ўзбек футбол мухлислари учун терма жамоамизни ЖЧда кўриш орзу бўлиб қолмоқда. Эътиборлиси ҳар сафар саралашнинг сўнгги босқичига қадар етиб борган бош жамоамиз якунда нимадир сабаб бўлиб мундиалдан қуруқ қолмоқда. Умид қиламизки, ушбу нохуш “анъана” 2018 йил барҳам топади.

Шаҳзод Холбоев тайёрлади