Азар тепган пенальти катта баҳс-мунозарага сабаб бўлмоқда

“Арсенал” клуби бош мураббийи Арсен Венгер “Челси”га қарши (2:2) кечган АПЛ 22-тур ўйинидан кейин ўз фикрини билдирди. Франциялик мутахассис Азарга нисбатан ишлатилган қўполлик эвазига қўйилган пенальти ҳақида алоҳида сўзлаб ўтди.

• Бельерин ўзини айбсиз айбдор деб ҳисобламоқда
• Азар: Ҳеч қандай такрорий вазият керак эмас, пенальти бор эди

“Ажойиб беллашув гувоҳига айландик, аммо бизга нисбатан ҳакамлар яна бир бор ноҳақлик қилишди. Ўйинга тайёргарлик кўриш чоғида ҳакамларнинг қарорларини ҳам инобатга олишимиз керак. Афсуски, яхши футболга ҳакамнинг адолатсиз қарорлари тўсқинлик қилади.

Бу мавзуда чуқурлашишни истамайман, чунки бундан хафа бўлиб кетаман. Лекин Азарнинг пенальтиси – бу жиддий эмас. Бундай қарорлар ўйин натижасига ўз таъсирини ўтказмоқда. Агар бизга қарши шундай пенальти берилган бўлса, бизнинг фойдамизга иккита 11 метрлик жарима зарбаси берилиши керак эди.

Видеотакрорлар ёрдам берадими? Ҳамма бу ҳақда гапиришни яхши кўради. ОАВ, ижтимоий тармоқларда буни муҳокама қилишади. Аммо мен учун яхши футбол муҳимроқ. Сўнгги 6 кунда 3 та ўйин ўтказдик. Жамоа бор кучини берди. Тиғиз тақвимга қарамай, ажойиб ўйин кўрсатдик”, – деди франциялик мутахассис.