Мухлислар Суперлигани соғинишмадими ёхуд 1-турда томошабинлар ташрифи кимда қандай?

1-4 март кунлари футбол бўйича Ўзбекистон Суперлигасининг дастлабки тур беллашувлари бўлиб ўтди. 3 ойлик танаффусдан кейин жамоалар яна чемпионат ўйинларига қайтдилар ҳамда илк расмий баҳсларда майдонга тушишди.

Баҳор фасли келиши билан одатда юртимизда футбол мавсуми ҳам бошланишини мухлислар интиқлик билан кутадилар. Ҳар холда кўпчилик шундай ўйлайди. Биринчи турдан бунинг натижасини стадионларда амалда кўрамиз, деб ўйладик. Лекин биз кутган рақамлар ҳосил бўлмади.

Наманганда “Навбаҳор” “Динамо”га қарши баҳс орқали Суперлигадаги иштирокини бошлади. Бу ўйинда энг кўп томошабин тўпланиш кутилганди. Аслида ҳам шундай бўлди, бироқ у қадар кутилган даражада эмас. Расмий протоколда мухлислар сони 7891 нафар деб ёзилган. Бу “Навбаҳор”дек клуб учун кам, албатта. Боз устига чемпионатнинг очилиш ўйини эди. Бундай паллада стадион деярли тўлиши тахмин қилинганди.

Ундан кейин энг кўп мухлис йиғилган учрашув сифатида “Сўғдиёна” – “Нефтчи” қарама-қаршилигини айтиш мумкин – 1810 нафар. Аслида бу жуда паст кўрсаткич. Лекин рақамлар алдамайди ва 1-тур кутилган ташрифни келтириб чиқаргани йўқ. Қаршида “Насаф” ва “Олимпик” ноқулай об-ҳаво шароитида, қор ёғиб турган маҳалда ўтказилди. Балки шунинг учун бўлса керак, ишқибозлар кўп бўлмади.

Энг кам мухлис “Бунёдкор” – “Қизилқум” учрашувида кузатилди. Хайҳотдек стадион деярли ҳувиллаган ҳолатда эди. Аренада бор-йўғи 251 томошабин холос. Олмалиқ ва Тошкентдаги ўйинларда ҳам мухлислар 1000 нафарга ҳам етгани йўқ. ОКМК – “Андижон” баҳсида 890 ишқибоз ёзилган. Уларнинг ярми Андижондан келган. “Локомотив” – “Металлург” ўртасидаги ўйинда 812 нафар мухлис келган. Уларнинг орасида “Локомотив” билан бирга “Металлург” ишқибозлари ҳам бор. 1-турда жами мухлислар сони 13497 тани ташкил қилди.

Негадир томошабинлар ташрифи ҳозирча анча кам. Балки иккинчи турда бу борада ўсиш кузатилар. Ҳар холда “Андижон” ҳам ўз уйида ўйнайди...

1-турда томошабинлар ташрифи

“Навбаҳор” – “Динамо” – 3:1. 7891 томошабин

“Насаф” – “Олимпик” – 2:0. 1154 томошабин.

“Бунёдкор” – “Қизилқум” – 1:3. 251 томошабин.

“Сўғдиёна” – “Нефтчи” - 1:2. 1810 томошабин.

ОКМК – “Андижон” – 0:0. 890 томошабин.

“Локомотив” – “Металлург” – 2:2. 812 томошабин.

“Сурхон” – “Пахтакор” – 0:3. 689 томошабин.

Жами: 13497

Шуҳратбек Жўраев.