Футболчи 6 йилдан сўнг майдонга қайтиб ғалаба голини урди

Футболчи қарийб олти йиллик танаффусдан сўнг яна майдонга қайтиб, дарҳол асосий таркибдан жой олиши кам учрайди. Ундан ҳам ҳайратланарлиси, у биринчи ўйинидаёқ жамоасига ғалаба олиб келадиган гол муаллифига айланади.

Колумбиялик ҳужумчи Жексон Мартинес айнан шундай сенсацион қайтишга эришди. Профессионал фаолиятини тугатганига олти йил бўлган футболчи кутилмаганда яна катта футболга қайтиб, «Депортиво Индепендьенте Медельин» клуби сафида майдонга тушди.

Кескин ва муросасиз курашлар остида ўтган учрашувнинг энг муҳим лаҳзаси 87-дақиқада юз берди. 

Мартинес рақиб дарвозасини ишғол этиб, жамоасига «Альянса» устидан 2:1 ҳисобидаги ғалабани таъминлади. Бу гол кўпчилик томошабинлар учун гўё махсус саҳналаштирилгандек, унинг катта футболга қайтишига муносиб нуқта қўйгандек туюлди.

Эслатиб ўтамиз, Жексон Мартинес ўз вақтида Европада ҳам яхши танилган бўлиб, у бир неча мавсум давомида «Порту» шарафини ҳимоя қилган.