Mantiq “left” Superliga

Norboy Muallim Superligada qovun tushurganlarni "pushka"ga olishda davom etadi.

Endilikda SPORTS.uz Superliga tur yakunlariga ko‘ra eng “yaxshilar”ni aniqlab boradi. Xo‘sh, oltinchi turda kimlar o‘zini yomon tomondan qolganlardan ko‘ra "yaxshiroq" ko‘rsatdi? Bizda beshta variant bor. Matn kattalashib ketmasligi uchun qisqa va lo‘nda tushuntiramiz!

5 o‘rin. Super legioner - Chukvuemeka 

“Qizilqum” chinakam “Sirli tulpor” obrazidagi jamoaga aylanib bormoqda. “Surxon”ga qarshi o‘yinda “konchilar” ayrim daqiqalarni juda faol o‘tkazgan bo‘lsa, boshqa minutlarda oziga o‘xshagani yo‘q. Asror Aliqulov jamoada balans topa olmayapti. Shunga qaramay, progress sezilayotgan “Surxon” bilan o‘yinda 3 ochko ishlab olishi hech gap emas edi.

Bahsning 58 daqiqasida Chukvuemka deyarli 2 metrdan aniq zarba yo‘llay olmadi. To‘g‘risi, bunday yaqin masofadan ham noaniq zarba yo‘llaydigan legionerlarni jamoaga kim taklif etgani menga juda qiziq. Agar men olib kelgan futbolchi shunday vaziyatni ko‘kka sovursa, boshqa agentlik qilmagan bo‘lar edim.

4 o‘rin. Uyda suv jo‘mragini ochiq qoldirgan Doston Tursunov

Yoshlar qaytgach, “Paxtakor” ancha dadillashib qolgani rost. Ayniqsa, Abbosbek Fayzullaev chinakam “katta futbolchi” maqomiga erishgani ko‘zga tashlana boshladi. “Sug‘diyona”ga qarshi o‘yinda aynan shu omil yuzaga chiqdi. Vaholanki, bahsning 3 daqiqasida Doston Tursunov yo‘q joydan jamoasiga qizil kartochka ishlab, ajoyib sovg‘a tayyorlab qo‘ygan edi. Endi-endi terma jamoa bosh murabbiyi e’tiboriga tushish arafasidagi yigitning jarima maydonchasida 21 yoshlik Xislat Xalilov bilan nimani bo‘lisha olmagani noma’lum, biroq “Paxtakor” Tursunov uchun ham 90 daqiqa ikki hissa kuch bilan jang qilishga majbur bo‘ldi.

OKMK bilan bo‘ladigan o‘yinda bu sarf etilgan ortiqcha kuch o‘z so‘zini aytishi mumkin. Boz ustiga, bu paytga kelib Maksim Shatskix yana kuchli zaxira variantlarisiz qolgan bo‘ladi. Qisqasi, Doston jamoasini nafaqat “Sug‘diyona” bilan o‘yinda, balki keyingi bahsda ham anchagina murakkab ahvolda qolishini ta’minlab berdi. Aynan u TOP 5 ni ochib beradi.

3 o‘rin. «Talpada» sezilmay ketgan Nasrullaev

“Nasaf” – OKMK o‘yinidan so‘ng, janjal va to‘polon shu qadar avjiga chiqdi-ki, hatto o‘yinda burilish nuqtasini yasagan bir epizod antiqahramoni chetda qolib ketdi. Sezganingizdek, gap birinchi bo‘lim o‘rtalarida 11 metrlik nuqtadan gol kirita olmagan Sherzod Nasrullaev haqida bormoqda.

Qanot himoyachisi o‘yindan so‘ng, saytimiz uchun bergan intervyusida omad undan yuz o‘girganini aytdi. Qisman bunda jon bor. Qo‘shimchasiga, Suhrob Sultonovning super reaktsiyasini ham alohida e’tirof etish shart. Agar “ajdarlar” birinchi bo‘limni tezkor gol bilan boshlay olganida, “Bunyodkor” ochilishga, o‘z “Game Plan ”ni o‘zgartirishga majbur bo‘lar edi. “Nasaf” esa, bunday imkoniyatdan foydalana olgani yo‘q. Nasrullaev o‘yinda burilish nuqtasini yasay olmadi. Bu esa, yakunda tablodagi natijaga, keyin o‘yindan keyingi asabiylikka ta’sir ko‘rsatdi.

2 o‘rin. Muxlislar e’tirofini 1 ochkoga almashgan sardor va kerak emas paytda portlagan Berdiev

Vaziyat har qancha keskin bo‘lmasin, Davron Ergashevni oqlash imkonsiz. U qoidaga ko‘ra, g‘alabani istaganicha nishonlashi mumkin. Bu uni tanlovi, biroq futbol muxlislar uchun o‘ynaladi. Bu sport turning er yuzidagi yagona “xaridorlari” ham aslida ular. Bir kishi kam bo‘lib qolgan “Nasaf” bilan o‘yinda mag‘lubiyatni durangga aylantirgan “Bunyodkor”ning sardori emotsiyalarini jilovlay olgani yo‘q. Bejizga futbolni sovuq miya va qaynoq yurak bilan o‘ynash kerakligi haqida murabbiylar bot-bot takrorlamaydi. Qahramonimiz bu ikkisini o‘rnini almashtirib qo‘ydi.

Undan keyin Ro‘ziqul Berdievning “yulduzli” onlari boshlandi. Murabbiy kutilmaganda “portladi”. Bu erda, Davron estafetani boshlagan bo‘lsa, Berdiev uni muvaffaqiyatli davom ettirdi. Yakunda, murabbiy juda qiyin pallada litsenziyasiz qolib ketishi mumkin. Oldinda “ajdarlar”ni muhim 5 o‘yin kutib turibdi. Taqvim qo‘rqinchili. Ergashev esa, yo‘qdan bor qilayotgan “Bunyodkor”ning chinakam sardoriga aylanish o‘rniga, reputatsiyasi uchun jiddiy zarba berdi. Yakunda, hech kim o‘z maqsadiga eta olmadi. Bundan eng ko‘p bu klublarning raqiblari naf ko‘rishi turgan gap.

1 o‘rin. G‘alati pas bergan Anzur, kutilmagan Qizil va 2 soniya xayol surgan Rahmonov

Bilmadim, bu xatolar guldastasini qanday nomlash mumkin? Keling, bir analiz qilamiz.

21 daqiqa umuman keraksiz epizodda Sanjar Tursunov besamar fol ekanligini bila turib oyoqlarini “Metallurg” futbolchisiga qarata baland ko‘tarib to‘g‘ridan-to‘g‘ri qizil kartochka olib maydonni tark etmoqda.

Ikkinchi epizodda qiziq voqea sodir bo‘ldi. OKMK markaziy himoyachisi Sardor Rahmonov raqib futbolchisi to‘p bilan oldinga borayotganini va uzatma amalga oshirmoqchi ekanligini ko‘rib turganiga qaramay, markaziy zonani berkitishga kechikdi.

Vaholanki, kadrda, u tezlik olishi va Ibrohim Ibragimovning yo‘liga chiqishi uchun 1-2 soniya vaqtga ega edi. Qo‘shimchasiga, hech kimga personal o‘ynamayotgan Anzur Ismoilov ham negadir markaziy zonani huvullab qolishiga e’tiroz bildirgani yo‘q. To‘pni to‘xtatish aralash zarba qilib yo‘llagan Ibragimovni g‘alati urunishini “Valisson” reaktsiyasi bilan bezab berdi.

Ikkinchi golda ham tushunarsiz holat. Ayni damda, Superliganing eng tajribali himoyachisi Anzur Ismoilov raqib bosim qilayotganini sezdi, darvozabon o‘rnini tashlab chiqganini ko‘rdi, ammo darvozabonga juda noqulay tarzda pas tashlab berdi.

Vaholanki, unda to‘pni shunchaki autga, yoki uzoqroqqa tepib yuborish variant ham bor edi. Buning uchun vaqt ham etarli edi. Faoliyati davomida “katta” o‘yinlarni ko‘rgan markaziy himoyachi qabul qilgan qaror uning maydondagi statusiga sira mos kelgani yo‘q. 

Bu uchlik birgalikda 6 turdagi TOP 5 ni birinchi pog‘onasiga egalik qilishi adolatdan bo‘ladi. “Quturgan” “Neftchi”, jilovlab bo‘lmas “Olimpik” va yulduzlarga to‘la “Navbahor”ga maydonda “non” qoldirmagan yigitlar bir kunda 3 ta qo‘pol xato qilishi mantiqqa to‘g‘ri kelmayapti. Konsentratsiyani OKMK "Metallurg" bilan o‘yinda shu qadar yoqotishini  siz kabi men ham tasavvur  qilmagan edim. Ba’zan shunaqasi ham bo‘lib turar ekan. 

Sizningcha, bu “TOP 5”dan “Neftchi” klubi qutilib qolgani adolatdan bo‘ldimi? Fikrinizni izohlarda yozib qoldiring!