ЖЧ-2014нинг энг яхши тўпурари "Атлетико Насионал"га ўтди

Колумбиянинг машҳур яримҳимоячиси Хамес Родригес мамлакатнинг етакчи жамоаларидан бири – "Атлетико Насьональ" билан шартнома имзолади. Бу ҳақда клуб матбуот хизмати хабар берди.Шартнома муддати очиқланмаган.

35 ёшли Родригес жорий йил феврал ойидан буён АҚШнинг Бош футбол лигасида иштирок этувчи "Миннесота" клуби шарафини ҳимоя қилиб келаётган эди. Ундан олдин у Португалиянинг "Порту", Франциянинг "Монако", Испаниянинг "Реал", Германиянинг "Бавария", Англиянинг "Эвертон", Грециянинг "Олимпиакос", Бразилиянинг "Сан-Паулу" ва Мексиканинг "Леон" жамоаларида тўп сурган.

"Реал" таркибида Родригес икки марта Испания чемпиони бўлган, шунингдек, Европа чемпионлар лигаси ва УЕФА Суперкубоги соҳибига айланган. "Бавария" сафида эса икки бор Германия чемпиони унвонини қўлга киритган.

Колумбия терма жамоаси билан Хамес Родригес 2014 йилги жаҳон чемпионатида 6 та гол уриб, мусобақанинг энг яхши тўпурари бўлган. Шунингдек, у Кубок Америкасида 2016 йилда бронза, 2024 йилда кумуш медалларини қўлга киритган.