Bugun Bilolbek jahon chempionligi uchun ringga ko‘tariladi

Bugun Rossiyaning Sankt-Peterburg shahri mezbonlik qilayotgan boks bo‘yicha yoshlar o‘rtasidagi jahon chempionatining 9-kunida final janglari o‘tkaziladi.

Kecha yarim finalgacha etib kelgan Bilolbek Mirzarahimov (60 kg.) o‘zining muvaffaqiyatli yurishini davom ettirib, musobaqaning final yo‘llanmasini qo‘lga kiritdi.

U yarim finil jangida turkiyalik Najot Ekinchiga umuman imkoniyat qoldirmay, 5:0 hisobida zafar quchdi. Endi bokschimiz hal qiluvchi jangda amerikalik Delante Jonsonga qarshi ringga ko‘tariladi.

Shuningdek, yarim finalning eng keskin va murosasiz bellashuvlaridan birida Otabek Xolmatov yaponiyalik Hayato Tsutsumiga 3:2 hisobida imkoniyatni boy berib, bronza medalini qo‘lga kiritdi.

Bundan tashqari yarim final janglarida Shunqor Abdurasulov (56 kg.) va Shohruz Rahimov (91 kg.) bronza medalini qo‘lga kiritgan edi.