“Уларнинг қорни оч эмас” ёхуд тишланғич футболчилар
Бугун сайёрамизнинг энг кучли тўпурар футболчиларидан бири, шунингдек, ўзининг “антиқа қилиқ”лари билан машхур бўлган Луис Суарес 30 ёшни қарши олмоқда. Ёдингизда бўлса, уругвайлик футболчи бир неча бор рақибларни тишлаб, бунинг натижасида эса дисквалификация қилиниб, бир муддат ўйин амалиётисиз қолиб кетган эди. Қизиғи футбол оламида Суарес каби “тишланғичлар” етарлича топилади. Қуйида эса айнан улар ҳақида ҳикоя этамиз.
Жермейн Дефо(“Тоттенхем”)
22.10.2006
Кимни тишлаб олган: Хавьер Маскерано(Вест Хэм”)
Қўлланилган жазо: сариқ карточка
Англиялик сермахсул футболчилардан бири – Жермейн Дефо ҳам Суаресдан қолишмайди. Тўғри, Дефо бу хатти-ҳаракатларни ўзини ҳимоя қилиш мақсадида бажарганини айтиш жоиз. Лондон дербиси – “Тоттенхэм” ва “Вест Хэм” жамоалари ўртасидаги ўйинда Маскерано паст бўйли рақибини икки оёғи билан ортдан келиб “чалади”. Дефо эса аргентиналик футболчининг қўлини тишлаб олади. Бош ҳакам Стив Беннет эса ҳар иккала футболчига сариқ карточка кўрсатиш билан чекланади.
Эмерсон Шейх(“Коринтианс”)
4.07.2012
Кимни тишлаб олган: Матиас Каруссо(“Бока Хуниорс”)
Жазо қўлланилмаган
2012 йилн Бразилиянинг “Коринтианс” клуби ўз тарихида илк бор Либертадорес кубоги финалига чиқади. Эмерсон эса финалдаги ҳар иккала голга муаллифлик қилади. Ўйин охирида эса “дубль” қайд этган футболчи рақиб қоида бузганидан сўнг, ерда ўтирган ҳолатда унга “фол” ишлатган Каррусонинг қўлини тишлаб олади. Бу вазият ҳакамларнинг назаридан четда қолади ва ҳужумчи ўйинни тўлиқ ўтказиб, турнирнинг бош совринини боши узра баланд кўтаради.
Хосе Мартинес Гульотта(“Бока Унидос”)
07.11.2013
Кимни тишлаб олган: Диего Хара(“Унион)
Жазо қўлланилмаган
Аргентина иккинчи дивизионида тишланғич дарвозабонларни ҳам учратишингиз мумкин. Гульотта ўз жарима майдончасидаги яккакурашдан сўнг, рақиб ҳужумчисининг елкасидан “бўса олади”. Қизиғи эса дарвозабон ушбу хатти-ҳаракати учун ҳеч қандай жазо олмайди.
Мирча Борнеску(“Петролул”)
29.05.2013
Кимни тишлаб олган: Саэр Аль Баваб(“Газ Метан”)
Қўлланилган жазо: қизил карточка
Румыния чемпионатида бундан бир неча йил муқаддам “Петролул” ва “Газ Метан” жамоалари ўртасидаги баҳсда оз эмас, кўп эмас 7 та қизил карточка кўрсатилади. Айниқса дарвозабон Борнеску рақиб ҳужумчисинининг қўлларини ўзининг тишлари билан ҳеч қўйвормайди. Гарчи юзига яхшигина мушт келиб тушган бўлса ҳам. Руминия футбол федерацияси эса ҳеч бир футболчини биттадан ортиқ ўйинга дисквалификация қилмагани ҳайратланарли.
Эдвин Хуртадо(“Депортиво Кеведо”)
13.08.2013
Кимни тишлаб олган: Андрес Франзойя(“Барселона Гуаякиль”)
Қўлланилган жазо: сариқ карточка
Эквадор чемпионатидаги ўйинларнинг бирида “Депортиво” ҳимоячиси жамоадошига нисбатан қўполлик ишлатган ҳужумчи – Франзойяни жахли чиққаниданми билмадик, бурнини тишлашга ҳаракат қилиб кўради. Омадни қарангки, ҳимоячи ўз мақсадига етиша олмайди. Бироқ спортчига хос бўлмаган ҳаракати учун сариқ билан “сийланади”.
Хуан Аранго(“Тихуана”)
05.04.2015
Кимни тишлаб олган: Хесус Савала(“Монтеррей”)
Қўлланилган жазо: икки ўйинли дисквалификация
Стандарт вазиятлар устаси бўлган Венесуела термасининг собиқ вингери – Хуан Аранго Мексика чемпионати доирасидаги дербида ўйинга шу даржада берилиб кетадики, финал ҳуштаги янграшидан олдин рақибнинг ўнг елкасини тишлаб олади. Бу вазият ҳакамлар назаридан четда қолган бўлсада, мамлакат футбол федерацияси Арангони икки ўйинга четлатади.
Бранислав Иванович
11.02.2015
Кимни тишлаб олган: Жеймс Маккарти(“Эвертон”)
Жазо қўлланилмаган
Бундан икки йил олдин “Эвертон” ва “Челси” ўртасидаги ўйиннинг сўнгги дақиқаларида Гаррет Барри Виллианга нисбатан қўпол ўйинидан кейин майдонда жанжал юзага келади. Бранислав Иванович эса ушбу ҳолат қизилга “тортишини” рақиб футболчиси Жеймс Маккартига тушунтирмоқчи бўлади ва рақибни тишлаб олади.
Шаҳзод Холбоев тайёрлади
Фикрлар