АГМК ёки “Сўғдиёна”? – Қайси жамоа курашни давом эттиради?

Бугун Суперлига 20-туридан ўрин олган учрашув ўтказилади. “Сўғдиёна” ўз уйида АГМКни қабул қилади. Беллашув 18:30да бошланади.

Миржалол Қосимов шогирдлари айни пайт турнир жадвалида 29 очко билан 6-ўринда бормоқда. Улуғбек Бақоев жамоаси эса 32 очко жамғарган ҳолда 5-поғонани банд этган. Орадаги фарқ 3 очкони ташкил қилади. Бу эса бўлажак беллашувнинг аҳамияти қай даражада эканлигидан дарак.

Икки жамоа ҳам чемпионлик курашидан чиқди. Аммо улар ОЧЛга бериладиган 4 йўлланмадан бирига даъвогарлик қилмоқда. Қолаверса, Ўзбекистон Кубогида юришини давом эттиряпти.

Шу сабаблар туфайли мазкур баҳс икки томон учун барибир муҳим саналади. Агар олмалиқликлар ғалаба қозонадиган бўлса, кеча имкониятни бой берган “Қизилқум”га етиб олади. Жиззахликлар зафар қучса, 3-ўринга кўтарилиб, “Навбаҳор”га яқинлашади. Дуранг ҳам ёмон эмас. Бироқ очколар фарқи яқинлиги боис икки жамоа ғалаба учун майдонга тушиши аниқ.

Охирги пайтда тақвими анча зич бўлган “Сўғдиёна” ФИФА кунлари сабаб дам олди. Улуғбек Бақоев жамоасидан Ўзбекистон МТЖга футболчи жалб этилмагани клубнинг фойдасига ишлаши мумкин. Бироқ мезбонлар таркибида 3 та йўқотиш мавжуд. Искандар Шайқулов, Шаҳбоз Жўрабеков ва Даниэл Насриддинов карточкалари 4 тага етгани боис олмалиқликларга қарши ўйинни ўтказиб юборади. АГМКда эса бундай йўқотиш йўқ.

Ғалаба қозониш имконияти Қосимов жамоасида бироз кўпроқдек. Аммо “Сўғдиёна” таркибдаги йўқотишларга қарамай охиригача курашиши аниқ. Чунки 4-ўрин орқали ОЧЛ саралашида иштирок этишни ҳамма хоҳлайди. Ўзбекистон Кубогида қийин рақиблар кутмоқда. АГМК борасида ҳам шундай дейиш мумкин. Шу боис чемпионатнинг ўзида курашни давом эттириш энг тўғри йўл ҳисобланади.

“Сўғдиёна” ва АГМК ўртасидаги ўйинларда ҳам фарқ катта эмас. Олмаликликлар ғалаба қозониш бўйича рақибидан биттага ортда қолмоқда. Жиззахликлар бугунги учрашув меҳмонини 10 марта таслим этган. Бундан кўриниб турибдики, АГМК ғалабалар бўйича кўрсаткични тенглаштириб қўйишга уринса, “Сўғдиёна” фарқни оширишга интилади. Бир сўз билан айтганда, бугун барчанинг эътибори Жиззахга қаратилади.

Бекзод ИСАЕВ