"Андижон"нинг навбатдаги рақиби ўз мамлакатининг 11 карра чемпиони!

Анталия йиғини доирасида ташкил этилаётган ўртоқлик ўйинларининг навбатдагисига ҳам этиб келдик. Бу сафар "Андижон" клуби ўзининг Туркиядаги учинчи ўртоқлик учрашувида майдрнга тушади.

"Бургутлар" Македониянинг энг машҳур клубларидан бири — "Вардар"га қарши майдонга чиқади. Бу жамоа ўзининг бой тарихи ва курашчан ўйини билан ажралиб туради. Биз учун бу ўйин тайёргарлик даражамизни синаш ва жамоавий ўйинни янада мустаҳкамлаш учун муҳим имконият бўлади.

"Вардар" Македониянинг 11 карра чемпиони ҳисобланади. Бу борада “Вардар” ўз мамлакатида ягона. Яна 6 карра мамлакат Кубогини ҳам қўлга киритган. 

Скопьенинг “Вардар” клубига 1947 йилнинг 22 июль куни асос солинган. Жамоани 51 ёшли Гоце Седлоски бошқариб бормоқда. У 2024 йилнинг ноябрь ойидан бери клубга устозлик қилмоқда.

Айни пайтда Македония чемпионатида 12 та жамоа иштирок этади. Биринчи даврадан кейин “Вардар” 42 очко билан пешқадам бўлиб турибди. Шунингдек, бу клуб еврокубокларда ҳам қатнашиб келади. 

“Андижон” жамоасининг “Вардар”га қарши беллашуви 20 январь санасида Тошкент вақти билан соат 18:30 да бошланади.

Эслатиб ўтамиз, бунгача андижонликлар иккита ўйинда қатнашишди. Илк учрашувда Туркининг "Сиверек Беледийеспор" клуби 3:0 ҳисобида таслим этилган бўлса, иккинчи ўйинда Венгриянинг "Вашаш" жамоаси 4:0 ҳисобида ғалаба қозонди.