Англия клуби биттада "Реал"нинг икки футболчисини олди

Испаниянинг етакчи клубларидан бири – "Реал" таркибида тарбия топган икки ёш футболчи бир вақтнинг ўзида Англияга йўл олди. Ҳужумчи Гонсало Гарсия ва ярим ҳимоячи Сесар Паласиос Лондоннинг "Фулхэм" жамоаси билан шартнома имзолади.

Англия клуби расмий сайтида берилган маълумотга кўра, ҳар икки футболчи билан тузилган келишув 2031 йил ёзигача мўлжалланган. Шу билан бирга, шартномани яна бир мавсумга узайтириш имконияти ҳам назарда тутилган.

Маълумотларга қараганда, Гонсало Гарсия учун "Фулхэм" 40 миллион евро тўлайди, шунинг устига яна 2 миллион евро миқдорида бонуслар ҳам кўзда тутилган. Сесар Паласиоснинг трансфери эса лондонликларга 10 миллион еврога тушган. Шу билан бирга, келажакда Паласиос бошқа клубга сотилса, "Реал" унинг кейинги трансфери суммасидан 30 фоиз улуш олади.

Ҳар икки футболчи "Реал" академияси тарбияланувчилари ҳисобланади. 22 ёшли Гарсия асосий жамоа сафида турли мусобақаларда жами 51 ўйин ўтказиб, 13 та гол урган. 21 ёшли Паласиос эса асосий таркибда еттита учрашувда майдонга тушишга улгурган.

"Фулхэм"даги бу ўзгаришлар клуб бош мураббийи лавозимидаги янгиланишлар фонида кечмоқда. Июль ойида жамоани испаниялик мутахассис Альваро Арбелоа қабул қилиб олди. У 2026 йил январидан июнигача "Реал"нинг бош мураббийи сифатида фаолият юритган эди.

Арбелоа қўл остида мадридликлар Испания чемпионатида иккинчи ўринни эгаллаб, ғолиб "Барселона"дан саккиз очкога орқада қолган. Энди у Лондонда ҳам айнан ўзи яхши танийдиган ёш футболчилар билан янги лойиҳа бошламоқда.