Англияга эмас, "Барса"га бораман!

«РБ Лейпциг» таркибида тўп сураётган 23 ёшли марказий ҳимоячи Кастелло Лукеба қишки трансфер ойнасида ёки 2027 йил ёзида «Барселона» сафига ўтишга розилик билдиргани хабар қилинмоқда. 

Франциялик футболчи ўтган ёзда унга қизиқиш билдирган Англия премьер-лигаси клубларидан кўра «Барса»ни афзал кўрган.

Маълумотларга кўра, «Барселона» бош мураббийи Ханзи Флик Лукеба ҳақида ижобий скаутлик хулосаларини олган ва унинг жамоа услубига мослаша олишига ишонмоқда. Ўтган ёзда спорт директори Деку Алессандро Бастони бўйича «Интер» билан музокаралар олиб борган, аммо Флик охир-оқибат чап оёқли марказий ҳимоячини олиш ғоясини маъқулламади. Шу даврда Лукеба номзоди ҳам муҳокама қилинган, бироқ музокаралар дастлабки босқичдан наригига ўтмаган.

«РБ Лейпциг» Лукебани тахминан 65 миллион евро атрофидаги миқдор эвазига қўйиб юбориши мумкинлиги айтилмоқда, бироқ бу сумма пасайиши эҳтимоли ҳам бор. Футболчининг ўзи эса Германиядаги фаолиятини якунлашга жиддий тайёргарлик кўраётгани таъкидланмоқда. «Лейпциг» уни уч йил аввал «Олимпик»дан 30 миллион евро эвазига олиб келган эди. Лукеба жисмоний кучи, тезкорлиги ва ҳимоядан ҳужумни бошлаб беришдаги маҳорат билан ажралиб туради.