АҚШ мухлисларга оммавий тарзда виза бермади
Кот-д’Ивуардан бўлган футбол ишқибозлари 2026 йилги жаҳон чемпионатининг гуруҳ босқичи учрашувларига бориш учун АҚШга кела олмайди. Бунинг сабаби – Америка томони жорий этган қаттиқ виза чекловлари. Натижада миллий жамоа ўз юртидан келадиган уюшган мухлислар қўлловисиз қолди, океан ортига боришга фақат бир неча расмий шахсларгагина рухсат берилган.
L'Équipe нашрига кўра, Кот-д’Ивуар Миллий мухлислар қўмитаси (CNSE) раҳбари Жюльен Куадио Адонис вазиятни шундай изоҳлаган:
"Мухлислар сафардан воз кечишга мажбур бўлишди, чунки Америка ҳокимиятлари айрим давлатлар, жумладан Кот-д’Ивуардан келадиган фанатларни ўз ҳудудида кўришни истамаяпти. АҚШ бизга очиқ-ойдин қилиб, мухлисларимизни қабул қилиш нияти йўқлигини билдирди. Бу ҳолат биз учун жуда оғир, чунки жамоани қўллаб-қувватлаш – бизнинг энг асосий бурчимиз. Биз трибуналарда ўз маданиятимиз ва қай тарзда жон куйдириб мухлислик қилишимизни намойиш эта олардик".
Аввалроқ қўмита чемпионатга тахминан 500 нафар мухлисни юборишни режалаштирган эди. Аммо охир-оқибат АҚШга фақат кичик бир гуруҳ амалдорлар кира олди. Энди уларнинг асосий вазифаси – аллақачон Қўшма Штатларда яшаб келаётган ивуарийликларни бирлаштириш ва жамоани қўллаб-қувватлашни ташкил этишдан иборат.
Манбалар таъкидлашича, АҚШнинг қаттиқ миграция сиёсати фақат трибуналардагина эмас, балки мусобақанинг бевосита иштирокчиларига ҳам таъсир кўрсатмоқда. Жумладан, Сомалиялик ҳакам Омар Артанга виза расман маъқулланганига қарамай, мамлакатга кириш рад этилган.
Кот-д’Ивуар терма жамоаси жаҳон чемпионатидаги иштирокини 15 июнь куни Филадельфия шаҳрида Эквадорга қарши ўйин билан бошлайди.
Фикрлар