Аргентина мухлислари ўққа тутилди

Аргентина футболида фаолият юритувчи «Тигре» клуби мухлислари кетаётган автобусга Жанубий Америка кубоги учрашувидан сўнг ўқ узилди. Бу ҳақда TyC Sports нашри хабар берди.

1/16 финал доирасидан ўрин олган илк баҳс Монтевидеода ўтказилди ва унда «Тигре» мезбон жамоа  «Насьонал» устидан 3:0 ҳисобида ғалаба қозонди. Учрашувдан кейин, тун ярмида шаҳарни тарк этаётган мухлислар автобуси номаълум шахслар томонидан ўққа тутилган.

Манбаларга кўра, ҳужум натижасида бир нафар мухлис яраланган. У қўлидан ўқ еб, шифохонага етказилган. Дастлабки тиббий ёрдам ва даволанишдан сўнг у касалхонадан чиқарилган, клуб эса унинг Буэнос‑Айресга қайтиб боришини ташкил этган.

«Тигре» клуби содир бўлган воқеага ижтимоий тармоқларда муносабат билдирди. Байнотда шундай дейилади: «Биз ҳар қандай зўравонликни кескин қоралаймиз. Футбол байрам бўлиши керак. Ҳеч қандай шароитда бизнинг одамларимиз хавф остида қолишини қабул қилиб бўлмайди».