Артета: "Бугун ҳамма "Борнмут" мухлисига айланади"

"Арсенал" бош мураббийи Микель Артета “Борнмут” — “Манчестер Сити” учрашуви олдидан ҳазиломуз фикр билдирди.

19 май куни “Борнмут” АПЛ 37-турида “Манчестер Сити”ни қабул қилади. Агар Пеп Гвардиола шогирдлари ғалаба қозона олмаса, “Арсенал” чемпионликни расман қўлга киритади.

Артетадан ушбу баҳсда “Борнмут” мухлиси бўладими деб сўралганда, у қуйидагича жавоб берди:

"Тарихдаги энг катта мухлиси бўламан! Менимча, бугун ҳаммамиз “Борнмут” мухлисига айланамиз. Чунки улар ижобий натижа қайд этса, бу нимани англатишини яхши тушунамиз", — деди испаниялик мутахассис.

Шунингдек, Артета “Борнмут” бош мураббийи Андони Ираолага алоҳида хабар юбориш нияти йўқлигини ҳам айтди.

"Менимча, унга ортиқча гапириш шарт эмас. У бу клубда ажойиб иш қилди. Жамоа қандай ўзгаргани ва қандай футбол ўйнаётгани барчасини кўрсатиб турибди", — дея қўшимча қилди Артета.