Асрор Алиқулов: "Бундай ўйинчимиз жамоада битта..."

Про лиганинг 10-турида “Машъал” клуби Муборакда “Олимпик Мобиуз”ни қабул қилиб йирик 3:0 ҳисобида рақибини таслим қилди. Учрашувдан сўнг “Машъал” бош мураббийи Асрор Алиқулов бир қатор саволларга жавоб берди.

- Биринчи таймда бошқа жамоани кўрдик, иккинчи бўлимда умуман бошқа жамоани гувоҳи бўлдик. Шу ҳақида тўхталсангиз.

- Биринчи бўлимда жамоамизда бироз чарчоқ кўринди. Иккинчи бўлимда футболчилардан тезлик қўшишини сўрадик. Бу ҳолатдан чиқиб кета олишимизга ишонардик. Голлар уриб мақсадимизга эришдик. Футболчиларимиз қарши ҳужумларда ўзларини яхши томондан кўрсатишди. Иккинчи бўлимдаги тезкор голлар ўйин тақдирини ҳал қилди.

- Иккинчи бўлимда захирадан майдонга туширилган Бабатунде ҳисобни очди. Кейинги голга ассистентлик қилди. Захирадан майдонга тушганлар ўзини оқлади. Шунингдек, Ислом Баратовни майдонга тушмагига ҳам тўхталиб ўтсангиз.

- Биринчи бўлимда ҳужумга ўтишда қийналдик. Техник қобилят, тўп билан ишлаш, майдонни кўра билиш, ўйинни ўзига оладиган футболчи етишмади. Бундай ўйинчи жамоамизда битта – бу Бабатунде. Юқори савиядаги футболчи. Захирадан майдонга тушиб жамоанинг ғалабасига катта ҳисса қўшди. Биринчи гол вақтида урилди ва муҳим гол эди. Шундан кейин жамоада ишонч ортди ва бирин-кетин голлар киритдик.

- Жамоадаги иккита дарвозабондан қайси бирини асосий таркибга муносиб деб баҳолайсиз?

- Ҳеч кимга асосий таркибдан жой кафолатланмаган. Тактик услублар, машғулотлардаги ишланмалар ва жараёндан келиб чиқиб мураббийлар штаби биргаликда таркибни аниқлаймиз. Ҳамма жамоада шунақа. Ҳозирда Вагинни ўйнаётгани бежиз эмас. У яхши ўйиин намойиш этяпти. Аммо бизда учта посбон ва барчаси асосий дарвозабонларимиз.

- Ўзбек футболида охирги пайтлардаги оғриқли муаммолардан бири пенальтида гол ура олмаслик бўлиб қоляпти. Бугун ҳам Хумоюн Муртазоев пенальтидан фойдалана олмади. Жамоада 11 метрлик жаримани бажарадиганлар нечта ва бунга алоҳида тайёргарлик кўриладими?

- Агар 0:0 ёки 1:0 бўлиб турганида анча-мунча футболчи бундай қалтис пайтда масъулиятни ўзига ололмасди. 2:0 дан кейин пенальти тепилди ва балки ҳисоб ҳам таъсир қилган бўлиши мумкин. Бу профессионалларча ҳолат эмас. Бу жамоани қилаётган меҳнати ва бундай пайтда имкони қадар пенальтидан фойдаланиши керак.

- Лекин у иккинчи бўлимда айбини ювиб кетди...

 - Ҳа. Кимларгадир имконият беришимиз мумкин эди. Бундай вазиятлар мураббийларни ҳам ўйин охиригача руҳий ҳолатда ушлаб туради. Биз режа қилган ўйинчиларни тушира олмаймиз.

- Биринчи бўлимда жисмоний чарчоқ кўринди ва футболчиларда бир-бирини тушунишда жузъий камчиликлар кўринди. Иккинчи бўлимда бунинг акси бўлди. Бу мураббийнинг чизгисими ёки ўзгариш бўлган Бабатунденинг савиясими?

- Бабатунде яхши чиқди. Лекин жамоа иккинчи бўлимда югуриб ўзини тиклаб олди. Жамоани шуғуллантирасиз, қандай юкламалар бераётганингизни ўзингиз биласиз. Биринчи бўлим ўрталарида ҳам биз иккинчи бўлимда тезлик қўша оламиз, деган фикрда эдик. Ўйлайманки, танаффусдан кейин енгил ўйнадилар ва кўп ҳолатларда қарши ҳужумга ўтганимизда “Олимпик Мобиуз” футболчилари қайтишга кеч қолишди. Футболчилар қийин ҳолатдан чиқиб кетдилар.

- Бу йил Суперлигада ҳам, про лигада ҳам яққол фаворитни кўрмаяпмиз. Ҳар бир турда ҳар хил натижа бўляпти. Бу ўзбек футболининг даражаси кўтарилаётганиданми ёки клубларнинг савияси бир хил бўлиб бормоқдами?

- Суперлигага келсак, пастдаги жамоалар ҳам тартибли ўйин кўрсатишяпти. Кўп мутахассислар савиямиз ошганини айтишяпти. Мен ҳам уларнинг фикрига қўшиламан. Футболда олдиндан айтиш қийин. “Бунёдкор” бир тур олдин кучли рақибга қарши кўрсатган ўйини ва кейинги турдаги ўйини...”Динамо”, “Металлург” каби жамоаларнинг ҳам ўйинини айтиш мумкин. Футболимиз савияси ошяпти. Про лигани ҳам Суперлигага таққослаш мумкин. Бу чемпионат мураббийларни ҳам, футболчиларни ҳам сергакда ушлаб турибди, бу яхши ҳолат.