«Аякс» Лукакуни сотиб олмоқчи

«Аякс» техник директори Йорди Кройф «Наполи» ҳужумчиси Ромелу Лукаку билан шартнома имзолаш имкониятини кўриб чиқмоқда. Soccernews.nl нашри хабарига кўра, амстердамликлар ҳужум чизиғини кучайтиришни режалаштирган ва бу борада тажрибали бельгиялик форвардга асосий номзод сифатида қарамоқда.

Йорди Кройф лавозимга келганидан сўнг «Аякс» раҳбарияти клубни қисқа фурсат ичида яна чемпионлик учун курашадиган даражага олиб чиқишни мақсад қилган. Кройфнинг ўзи ҳам жамоа учун «ўтиш даври» деган баҳона бўлмаслигини, агар клуб чемпионликка даъвогар бўлмаса, буни шахсий мағлубияти сифатида қабул қилишини таъкидлаган эди.

Ёзги трансфер ойнасида «Аякс» жиддий ўзгаришларга қўл урди: жамоага «Жирона»дан бош мураббий Мичел таклиф этилди, «Монако»дан Кайо Энрике билан шартнома имзоланди. Шунингдек, клуб эркин агент сифатида Марк-Андре тер Штеген ва Дейли Блинд билан келишувга эришди.

Ромелу Лукакунинг «Наполи» билан амалдаги шартномаси 2027 йил ёзигача мўлжалланган. Шу билан бирга, унинг Италия клубидаги келажаги ҳануз ноаниқлигича қолмоқда. Энг катта тўсиқ сифатида футболчининг маоши тилга олинмоқда — Лукаку бир йилда 7 миллион евронадан ортиқ иш ҳақи олади. Бу эса эҳтимолий трансфер музокараларини анча мураккаблаштириши мумкин.