Азим Аҳмедов: "Навбаҳор" мухлисларини бағрига шамол тегиши керак"

Суперлиганинг 7-турида яна водий дербисини кўрамиз. Бу сафар “Турон” ўз уйида “Навбаҳор”ни қабул қилади. Яйпанликлар ҳали ғалаба нималигини билмай келмоқдалар. Улар ғалаба учун бор имкониятини ишга солиши аниқ.

“Турон”нинг етакчиси Азим Аҳмедов учун ҳам бўлажак ўйин қандай аҳамиятга эга эканини барча билиб турибди. “Навбаҳор”да узоқ йил тўп суриб, жамоага фойдаси теккан футболчи эндиликда “Турон” шарафини ҳимоя қилмоқда. Дерби олдидан Sports.uz журналисти Аҳмедов билан суҳбатлашди.

- “Турон” жамоасини водий дербиси доирасида “Навбаҳор”га қарши муҳим учрашув кутиб турибди. Аввало, жамоанинг бўлажак баҳсга тайёргарлиги ва кайфияти қандай? Дастлаб, шунга тўхталиб ўтсангиз!

- Дерби мақомидаги ўйин жуда қизиқ ўтса керак. Чунки “Турон”га ҳам, “Навбаҳор”га ҳам ғалаба ниҳоятда зарур. Боиси, 3 очко жамоаларга жуда керак. Учрашувга яхши тайёргарлик бўлди. Худо хоҳласа, яхши ўйин кўрамиз.

- "Турон"га россиялик янги бош мураббий Денис Бушуев келди. Айтинг-чи, у қандай мутахассис экан ва дастлабки таассуротлар қандай?

- Тўғри, янги мураббий келди. Лекин, биласизми, мен ҳали машғулотларга қўшилмадим. Бироз жароҳатим бор эди. Аммо машғулотларини кузатганимда яхши, қизиқарлик бўляпти.

- Ўтган турда майдонга тушмагандингиз. Мухислар сизни водий дербисида кутишаётганди. Демак, навбатдаги баҳсни ҳам ўтказиб юборасизми?

- Ҳали аниқ эмас. Балки майдонга тушишим ҳам мумкин. Кўрамиз.

- “Навбаҳор”га қарши баҳс сиз учун алоҳида аҳамиятга эгами?

- Менга ҳамма жамоага қарши ўйин аҳамиятли. Тўғри, “Навбаҳор” алоҳида аҳамиятга эга, мен учун. Намангандан айнан шу ўйинни кўргани жуда кўп танишларим келишмоқчи.

- Ҳозирча “Турон” чемпионатда ғалаба қозона олмаяпти. Ҳолбуки, таркиб яхши йиғилган. Мураббий ўзгаргани вазиятга ечим бўлади, деб ўйлайсизми?

- “Турон” жамоасига жуда яхши футболчилар йиғилган. Қанақадир омад етишмаяпти. Вазиятларни голга айлантиришда оқсаяпмиз.

- Азимжон, бу йил чемпионлик учун кураш жиддий тус оляпти. Нима деб ўйлайсиз, собиқ клубингиз - "Навбаҳор" чемпионликни қўлга кирата оладими?

- Ҳа, ажойиб тарзда ўтяпти. “Навбаҳор”га омад. “Навбаҳор” мухлисларини бағрига шамол тегиши керак, деб ўйлайман. Улар чемпионликни анчадан бери кутишяпти. Жамоада жуда маҳоратли футболчилар йиғилган. Улар эса мухлисларни хурсанд қилиши керак, деб ўйлайман.

- Янги бош мураббий билан суҳбатлашгандирсиз-а?

- Ҳа, суҳбатлашдим. Ҳаммаси яхши. Менинг ҳолатимни тушунтирди. Ҳаммамиз яхши натижа учун ҳаракат қиламиз.

- Дербида қандай натижа кутяпсиз?

- Айтиб ўтганимдек, кучли ўйин бўлади. Иккала жамоага ҳам ғалаба жуда муҳим. Шунинг учун учрашувдан кўп нарса кутяпман. Дербида кучлиги ютсин.

Шуҳратбек Жўраев.