Баркола ПСЖдан нега кетмоқчи?

“Пари Сен-Жермен” қанот ҳужумчиси Брэдли Баркола жамоадан кетиш пайига тушиб қолган. Клуб раҳбарияти ҳам уни сотиб юборишга тайёр.

Истеъдодли тўпурарга Европанинг қатор грандлари оғиз сола бошлади. Барколанинг Париж клубидан кетишга уринаётган унинг жамоадаги мавқеидан норози экани билан боғлиқлиги айтилмоқда.

Бош мураббий Луис Энрике Брэдлини Европа  Чемпионлар лигасининг ярим финали ва финалида асосий таркибда майдонга туширмади ва ўйинчи бундан қаттиқ хафа бўлди.

Вазиятга TEAMtalk нашри журналистлари аниқлик киритди.

Манбага кўра, мавсумнинг ҳал қилувчи ўйинларида асосий таркибдан жой олмагани Барколага ўзи хоҳлаган даражада ўйин амалиётига эга бўлиши қийин бўлишини англатган.

Футболчининг жамоани тарк этиш истаги ҳақида клуб раҳбариятига маълум қилинган. Барколага “Арсенал”, “Ливерпуль”, “Барселона”, “Бавария” ва “Реал” клуби қизиқиш билдирмоқда.

Ўтган мавсумда у барча мусобақаларда 49 та ўйинда иштирок этиб, 13 та гол ва 7 та ассист қайд этди. Унинг шартномаси 2028 йил ёзигача амал қилади. Transfermarkt футболчини 70 миллион еврога баҳоламоқда.