Барколанинг ПСЖдан кетиши мумкин!

ПСЖ жамоаси ҳужумчиси Брэдли Баркола клубдаги ҳолатидан мамнун эмас. TEAMtalk нашрининг ёзишича, ёш вингер Чемпионлар лигаси ярим финали ҳамда финалида асосий таркибдан ўрин олмагани сабаб жиддий ранжиган.

Манба маълумотларига кўра, мавсумнинг энг муҳим ўйинларида захирада қолиш Барколага «ПСЖ»да етарлича ўйин амалиёти олиши қийин бўлишини англатган. Шунингдек, футболчи клуб раҳбариятига жамоани тарк этиш истагини билдирган. Парижликлар ҳужумчини сотишга ошиқмаяпти, бироқ унинг норозилигини ҳам яхши тушунишмоқда.

Барколага Европанинг қатор етакчи клублари – «Арсенал», «Ливерпуль», «Барселона», «Бавария» ва «Реал» Мадрид томонидан жиддий қизиқиш борлиги хабар қилинмоқда.

Ўтган мавсумда вингер барча мусобақаларда жами 49 та ўйинда майдонга тушиб, 13 та гол урди ва 7 та голли пас берди. 

Унинг «ПСЖ» билан амалдаги шартномаси 2028 йил ёзигача мўлжалланган. Transfermarkt портали маълумотларига кўра, Барколанинг бозор қиймати 70 миллион еврони ташкил этади.