"Барса" полиция ҳаракатларини қоралади

«Барселона» клуби Ла Лиганинг 2-туридан ўрин олган «Эльче»га қарши ўйин (5:0) олдидан полиция ҳаракатларини кескин қоралаб чиқди.

Матч бошланишидан аввал «Мануэль Мартинес Валеро» стадиони атрофида полиция ходимлари «Барселона» мухлисларини тўхтатиб, улардан Каталония мустақиллиги ҳаракати билан боғлиқ байроқларни олиб қўйган. Қолаверса, ушлаш жараёнида мухлислардан бири калтаклангани хабар қилинди. Клуб бу чораларни ортиқча ва асоссиз деб баҳолади.

«Барселона» клуби кеча «Эльче»га қарши чемпионат учрашуви олдидан «Мартинес Валеро» стадиони яқинида юз берган воқеалар чоғида клуб аъзолари ва мухлисларига нисбатан куч ишлатилиши мутлақо номутаносиб бўлганини қатъий қоралайди», — дейилади баёнотда.

Клуб айниқса бир мухлисни ушлаш пайтида қўлланилган чоралар ҳаддан ташқари кескин бўлгани, куч ишлатиш эса на ҳуқуқий, на ахлоқий жиҳатдан оқланмаслигини таъкидламоқда. «Барселона» ушбу мухлис ва унинг оиласига зарур бўлган ҳар қандай ёрдамни кўрсатишга тайёрлигини маълум қилди.

Клуб шунингдек полиция ходимлари яна бир бор «Эстелада» байроқларини мусодара қилганидан афсусда эканини билдирди. «Эстелада» — расман рухсат этилган рамз бўлиб, уни кўтариш сўз эркинлигининг қонуний кўриниши ҳисобланади. Шу боис у ўз-ўзидан нафрат ёки зўравонликка даъват сифатида талқин қилиниши мумкин эмас.

«Барселона» мазкур воқеалар юзасидан тегишли тушунтиришлар берилишини кутаётганини маълум қилди. Клуб ўз аъзолари ва мухлисларининг қадр-қиммати, ҳуқуқлари ва фикр билдириш эркинлигини ҳимоя қилиш мақсадида — ҳам «Спотифай Камп Ноу» стадионида, ҳам рақиб жамоалар майдонларида — ўзи зарур деб ҳисоблаган барча чораларни кўриш ҳуқуқини ўзида сақлаб қолишини қайд этди», — дейилади клубнинг расмий сайтида эълон қилинган баёнотда.