"Барса" жаҳон чемпионини олади

Ла лига чемпиони «Барселона» Испания терма жамоаси ҳимоячиси Эмерик Лапортни жамоага олиб келиш имкониятини кўриб чиқмоқда, деб хабар бермоқда SPORT нашри. 

Каталония клуби 32 ёшли футболчига 2026 йилги жаҳон чемпионатидаги муваффақиятли ўйинидан сўнг жиддий эътибор қаратди. Лапорт жаҳон чемпиони бўлган Испания терма жамоасининг асосий фигураларидан бирига айланди ва марказий ҳимояда Пау Кубарси билан ишончли жуфтлик ҳосил қилди.

Манба маълумотларига кўра, яқин кунлар, эҳтимол, ҳатто соатлар ичида «Барселона» вакиллари ҳимоячи атрофидаги одамлар билан боғланиб, унинг режалари ва эҳтимолий трансфер шартларини билиб олишни режалаштирмоқда. Илк норасмий мулоқотлар спорт директори Деку АҚШда бўлган пайтдаёқ бошланган. Ўшанда томонлар жаҳон чемпионати якунланганидан кейин музокараларга қайтишга келишиб олган эди.

«Барселона» раҳбарияти Лапортни марказий ҳимояни кучайтириш учун мос номзод деб ҳисобламоқда. Клубда унинг чап оёқда ўйнай олиши, юқори даражадаги тажрибаси, етакчилик фазилатлари ва ҳужумларни аниқ узатмалар билан бошлаб бериши алоҳида қадрланмоқда.

Молиявий жиҳатдан ҳам бу трансфер жозибадор кўринади. SPORT маълумотларига кўра, футболчи шартномасидаги тўлов миқдори 15 миллион евродан кам. «Барселона»да Лапорт яна бир неча мавсум юқори даражада ўйнай олишига ишонишмоқда.

Жаҳон чемпионати давомида ҳимоячининг ўйинини «Барселона» президенти Жоан Лапорта ва Деку шахсан кузатган. Клуб вакиллари унинг ҳаракатларидан мамнун қолган, Кубарси билан муваффақиятли ҳамкорлиги эса трансфер тарафдорлари учун яна бир муҳим далилга айланган.

Каталония клуби тажрибали футболчи ёш Пау Кубарси учун Иньиго Мартинес каби ишончли шерикка айланишига умид қилмоқда. Эслатиб ўтиш жоиз, дастлаб Мартинесни олиб келиш қарори саволлар туғдирган эди, аммо кейинчалик баск ҳимоячи жамоа оборонасининг муҳим бўғинига айланди.

Шу билан бирга, «Барселона» қарор қабул қилишда шошилмасликка интилмоқда. Лапорт томони билан дастлабки алоқа ўрнатилгандан сўнг, Деку эҳтимолий битим шартларини чуқур ўрганиб чиқади ва клубга расмий музокараларга ўтиш-ўтмаслик бўйича тавсия беради.

Эслатиб ўтамиз, 2026 йилги жаҳон чемпионатида Эмерик Лапорт Испания терма жамоасининг асосий марказий ҳимоячиларидан бири бўлди. У Пау Кубарси билан бирга миллий жамоага жаҳон чемпиони унвонини қўлга киритишда катта ҳисса қўшди.