“Барса” Левандовски масаласини ҳал қилди

“Барселона” мутасаддилари 36 ёшли польшалик тўпурар Роберт Левандовскини 2027 йилнинг ёзигача жамоада олиб қолишга қарор қилди.

Sport.es сайтининг маълум қилишича, тез орада ҳужумчининг амалдаги шартномаси 2026 йилнинг 30 июнигача автоматик тарзда узайтирилади. Бунинг учун Левандовски жорий мавсумдаги учрашувларнинг 55 фоизида қатнашиши кифоя. Бу муддат тез орада келади.

Шунга қарамай, Каталония клуби хўжайинлари Робертга янги ҳамкорлик битимини беришга тайёргарлик кўрмоқда.

Левандовски ва клуб мутасаддиларининг дўстона алоқаларга эга эканини инобатга олган экспертлар футболчини янги келишувга кўндириш ҳеч қандай муаммо туғдирмаслигини таъкидламоқда.

“Барселона” 2022 йилнинг ёзида Левандовскининг “Бавария”дан 45 миллион еврога трансфер қилганди. Жорий мавсумда бу ҳужумчи самарали ўйин кўрсатмоқда. Роберт 34 та учрашувда қатнашиб, 32 та гол ва учта ассист муаллифи бўлди.