“Барса” олис Бразилиядан янги истеъдод топди

Испаниянинг «Барселона» клуби Бразилиянинг «Атлетико Паранаэнсе» жамоасида ўйнайдиган 19 ёшли марказий ҳимоячи Артур Диасга қизиқиш билдирмоқда.

Каталония клубининг скаутлар бўлими раҳбари Жоау Амарал футболчининг ўйинини баҳолаш учун Бразилия Серия Асидаги «Баия»га қарши учрашувни шахсан стадионда кузатган. Бу ҳақда UmDois Esportes хабар берди.

Манба маълумотига кўра, «Атлетико Паранаэнсе» ўтган ёзда футболчи учун Англия клубидан тушган 21 миллион евролик таклифни рад этган.

Диасга «Барселона»дан ташқари «Тоттенхэм», Мадриднинг «Атлетико» клуби, «РБ Лейпциг», «Ньюкасл» ва «Бенфика» ҳам қизиқиш билдирмоқда.

Диас «Атлетико Паранаэнсе»нинг асосий таркиб футболчиси ҳисобланади. У Бразилиянинг 20 ёшгача бўлган ёшлар терма жамоасида ўйнаган ва яқинда мамлакат миллий терма жамоасига биринчи бор чақирув олган.

Футболчининг клуб билан амалдаги шартномаси 2028 йил охиригача мўлжалланган. Transfermarkt маълумотларига кўра, Диаснинг бозор қиймати 3 миллион еврони ташкил этади.