“Барса” собиқ ўйинчисини Европага қайтаради

Испаниянинг амалдаги чемпиони “Барселона” ҳимоя чизиғини кучайтириш мақсадида Европанинг бир қатор гранд клубларида ўйнаган португалиялик футболчи Жоау Канселуни яна Каталонияга қайтармоқчи.

Клуб спорт директори Деку ўнг қанот ҳимоясини айнан 31 ёшли ўйинчи ёрдамида кучайтирмоқчи. Канселу жамоага келадиган бўлса, унинг мослашиши учун вақт талаб этилмайди.

2024 йилнинг ёзидан бери “Ал-Ҳилол”да ўйнаётган Канселу Саудия Арабистонини тарк этишни истаяпти. Унинг бу қарори каталонияликларга трансферни амалга оширишда қўл келиши мумкин.

Канселу аслида “Бенфика” тарбияланувчиси ҳисобланади. Фаолияти давомида “Валенсия”, “Интер”, “Ювентус”, “Бавария”, “Барселона” ва “Манчестер Сити” каби кучли клубларда ўйнаб, катта тажриба тўплаган.