“Barsa”da hech kim bunaqa erta haydalmagan!

“Barselona” Evropa chempionalar ligasining umumiy bosqich birinchi turida muvaffaqiyatsiz ishtirok etdi.

Frantsiyada “Monako” futbolchilari kataloniyaliklar ustidan 2:1 hisobida zafar quchdi. Mezbonlardan Magnes Akliush va Jorj Ilinexena o‘z nomiga bittadan gol yozdirib qo‘ygan bo‘lsa, mehmonlarning javob to‘pini Lamin Yamal kiritdi.

“Barselona” uchrashuvni bir kishi kam bo‘lib o‘tkazdi. Yarim himoyachisi Erik Garsiya 10-daqiqadayoq qizil kartochka olib, jamoadoshlarini qiyin ahvolga solib qo‘ydi.

OptaJose portalining ma’lum qilishicha, “Barselona” tarixida hali hech kim Evropa Chempionlar ligasida bunaqa erta maydondan haydalmagan.

Ispaniyalik futbolchi raqib hujumini to‘xtatishda jarima maydoni atrofida qo‘pollik ishlatdi. Hakam buni so‘ngg umid chorasi sifatida baholab, cho‘ntagidan qizil kartochka oldi.

Bu germaniyalik bosh murabbiy Xans-Diter Flikning "Barselona"ga kelganidan beri birinchi mag‘lubiyati sifatida qayd etildi.