“Барса”да катта йўқотиш

Испаниянинг амалдаги чемпиони “Барселона” янги мавсум олдидан катта йўқотишга дуч келди. Ярим ҳимоячиси Френки де Йонг Нидерландия терма жамоаси йиғинида тизза жароҳатини олди ва тўрт ойгача майдондан четда қолиши мумкин.

Футболчи жароҳат билан Каталония клубига қайтиб келган.

Ҳозирча якуний ташхис қўйилмаган ва яқин кунларда де Йонг қўшимча тиббий текширувлардан ўтади. “Барселона” раҳбарияти футболчининг ҳолатидан жиддий хавотирда.

Ўтган мавсумда ярим ҳимоячи сон мушаклари жароҳати сабабли қарийб икки ой майдонга тушмаган эди. Бу давр февраль ойи охиридан апрель бошларигача бўлган ҳал қилувчи босқичга тўғри келган.

Бундан ташқари, у аввал икки марта тўпиқ жароҳатини олган ва умумий ҳисобда олти ой ҳамда 31 та ўйинни ўтказиб юборган.

Агар прогнозлар тасдиқланса ва тикланиш тўрт ой давом этса, де Йонг фақат ноябрь ойида майдонга қайтиши мумкин ва мавсум бошланишининг катта қисмини ўтказиб юборади.

Нидерландия терма жамоаси 2026 йилги жаҳон чемпионатининг 1/16 финалида Марокашга пенальтилар сериясида мағлуб бўлиб (1:1, пенальтиларда 2:3), мусобақани тарк этган эди.