“Барса”га “кичкина Месси” керак эмас!

«Барселона» спорт директори Деку клуб Кичкина Месси лақаби билан машҳур «Манчестер Юнайтед»нинг ёш иқтидори Жей-Жей Габриэлга қизиқиш билдираётгани ҳақидаги хабарларга муносабат билдирди.

Ўтган ҳафта 15 ёшли Габриэл «Барселона»да кўрилган эди. Бундан аввал ёш ҳужумчи «Манчестер Юнайтед»ни тарк этиш нияти борлигини клубга билдирган.

Хабарларга кўра, Испания Габриэл оиласи учун устувор йўналиш ҳисобланади. Бироқ Деку Жей-Жейнинг вазиятини тўлиқ тушунмаётганини айтди ва бу масалада ўзини четда тутишни маъқул кўрмоқда.

- Бу футболчи ҳақида айтадиган гапим йўқ. Бу одатий ҳолат, чунки биз билан доимо турли футболчилар боғланади. Бундай ҳолатлар ҳатто ёш футболчилар борасида ҳам жуда кўп учрайди.

Биз унинг вазиятидаги ҳеч бир футболчига қизиқмаяпмиз. Нима бўлаётганини аниқ билмайман, аммо агар у ҳали ҳам «Манчестер Юнайтед» футболчиси бўлса, бу масаланинг бизга алоқаси йўқ.

Аввало, бирор ҳаракат қилишдан олдин унинг вазияти қандай эканини тушуниб олишимиз керак. Ёш футболчилар, ўсмирлар билан музокара олиб бориш эса бизнинг ишимиз эмас, - деди Деку talkSPORT нашрига.