“Барса”ни устидан кулишди

Бундеслига гранди “Бавария”нинг фахрий президенти Ули Хёнесс Германия кубоги финалидаги ғалабадан кейин  жамоа тўпурари Ҳарри Кейн ҳақида фикр билдирди.

“Бавария” ҳал қилувчи баҳсда англиялик ҳужумчининг хет-триги эвазига “Штутгарт”ни 3:0 ҳисобида мағлуб этди ва навбатдаги совринга эга чиқди.

- Ҳарри Кейн – биз амалга оширган энг яхши трансфер, - деди Хёнесс Das Erste телеканалига берган интервьюсида.

Журналист унга Кейнни “Барселона” билан боғлаётган хабарлар ҳақида эслатганда, Хёнесс кескин жавоб қайтарди:

- “Бавария” – зўр футболчиларни сотадиган эмас, аксинча сотиб оладиган клуб… Қолаверса, “Барселона”да  бу трансферга барибир пул йўқ, - деди Ули Хёнесс истеҳзо билан.

Жорий мавсумда Ҳарри Кейн клуб даражасидаги 51 та ўйинда 61 та гол уришга муваффақ бўлди.