«Барселона» «Атлетико»га Хулиан Альварес учун 100 миллион евро таклиф қилди.

Каталониянинг етакчи клуби "Барселона" аргентиналик ҳужумчи Хулиан Альваресни сотиб олиш бўйича "Атлетико" Мадридга расмий таклиф йўллади. Журналист Фабрицио Романо маълумотига кўра, каталонияликлар трансфер учун 100 миллион евро таклиф этган.

Бундан олдин испан телеканали Mega хабар беришича, "Пари Сен-Жермен" ҳам Альварес учун жуда жиддий курашга қўшилган. Париж клуби 120 миллион евро таклиф қилгани, шунингдек, "Атлетико"га икки футболчисини ҳам беришга тайёр экани айтилган. As нашрига кўра, гап Ли Кан Ин ва Гонсалу Рамуш ҳақида кетмоқда.

Манбалар таъкидлашича, "Барселона" таклифига ҳеч қандай бонуслар ёки қўшимча шартлар киритилмаган. Бу эса "Атлетико" раҳбариятини қониқтирмаётгани айтилмоқда. Шу билан бирга, Альвареснинг ўзи клуб раҳбариятидан жамоани тарк этишга рухсат сўрагани хабар қилинган.

26 ёшли Хулиан Альварес "Атлетико" шарафини 2024 йилдан буён ҳимоя қилиб келмоқда. Ундан олдин ҳужумчи Англиянинг "Манчестер Сити" жамоасида тўп сурган. Манчестер клуби таркибида икки карра Англия чемпиони (2023, 2024), бир бор Чемпионлар лигаси ғолиби (2023), клублар ўртасидаги жаҳон чемпионати ғолиби (2023), мамлакат кубоги соҳиби (2023), мамлакат суперкубоги (2024) ва УЕФА суперкубоги (2023) эгасига айланган.

Альварес шунингдек, Аргентинадаги "Ривер Плейт" клуби шарафини ҳимоя қилган. Бу жамоа билан бирга у миллий чемпионат (2021), Кубок Либертадорес (2018), Аргентина кубоги (2019) ва Аргентина суперкубоги (2019)ни қўлга киритган.

Аргентина терма жамоаси сафида Альварес 51 ўйин ўтказиб, 14 та гол урган ва 4 та голли узатма амалга оширган. У терма жамоа билан биргаликда 2022 йилги жаҳон чемпионати, шунингдек, Америка кубоги (2021, 2024) ва 2022 йилдаги Финалиссимада ғолиб бўлган.