"Барселона" янги трансферни эълон қилди

«Барселона» расмий сайтида «Брюгге» клуби ярим ҳимоячи-ҳужумчиси Жесси Бисиву билан шартнома имзоланганини маълум қилди.

18 ёшли футболчи билан тузилган келишув 2031 йилнинг ярмигача мўлжалланган.

Спорт журналисти Фабрицио Романо тарқатган маълумотга кўра, каталонияликлар ёш бельгиялик вингер учун 8,5 миллион евро тўлайди. Шунингдек, келишувга биноан, «Брюгге» футболчи келажакда бошқа жамоага сотилса, трансфер суммасининг 20 фоизини олади.

Жесси Бисиву 2023 йилдан буён «Брюгге»нинг захира таркибида тўп суриб келаётган эди. Ўтган мавсумда у барча мусобақалар доирасида 23 ўйинда майдонга тушиб, 3 та гол урди ва бир бор голли узатма берди. Transfermarkt портали маълумотларига кўра, ёш футболчининг бозор қиймати ҳозирча 800 минг евро атрофида баҳоланмоқда.