Benzemaga Ispaniyadan jamoa topildi

«Al-Hilol» klubi hujumchisi Karim Benzema faoliyatini La Ligada davom ettirishi mumkin.

Saudiya Arabistoni klubi «Aston Villa» forvardi Olli Uotkins bilan kelishuvga erishgani aytilmoqda. Shu boisdan, jamoa 38 yoshli fransuz hujumchisini qo‘yib yuborishga tayyor ekani xabar qilinmoqda. 

Transfer News Live nashri ElGolDigital manbasiga tayanib yozishicha, Benzemani olish variantini «Betis» ko‘rib chiqmoqda. Ammo sevilyaliklar muzokaralarga faqat bir shart bilan kirishishi kutilmoqda: agar Madrid «Real»ining sobiq yulduzi «Al-Hilol» bilan shartnomasini bekor qilib, erkin agentga aylansa.

Shu bilan birga, insayderlar ma’lumotiga ko‘ra, Karim Benzema shartnomani bir tomonlama bekor qilishga rozi emas. U faqat barcha maoshi to‘liq to‘lab berilgan taqdirdagina kelishuvni uzishni ko‘rib chiqishi mumkin. «Oltin to‘p» sohibi bilan amaldagi shartnoma kelasi yozgacha mo‘ljallangan.