Бердиев ёки Абрамов? Денис Иванков жавоб берди

SPORTS.uz сайти таниқли мураббий - Денис Иванков билан суҳбат уюштирди. Суҳбат давомида дарвозабонлар мураббийи фаолиятидаги қизиқарли воқеалар ҳақида сўзлаб берди. «Насаф» жамоасидаги фаолияти карьерасида катта ўзгариш содир этгани борасидаги билдирган фикри кўплаб мухлислар учун қизиқ бўлса, ажаб эмас.

- Мураббийлик фаолиятингизда «Насаф» катта бурилиш ясагани ростми? Айнан нима эвазига Қарши клубида топ даражадаги мураббийга айландингиз?

- Дарҳақиқат, Қашқадарёдаги унумли фаолиятим учун ҳали-ҳанузгача Рўзиқул Бердиевдан миннатдорман. «Насаф»га келгунимга қадар, улар билан таниш эдим, бироқ ўртамизда дўстона алоқалар йўқ эди. У менга ишонди ва таклиф билан чиқди. Мен унинг билдирган ишончини оқлаш учун қўлимдан келган барча ишни амалга оширдим. Бердиевни уялтириб қўймаслик учун ҳаракат қилдим. Биргаликда кўплаб қийинчиликларни енгиб ўтишга тўғри келди. Ҳозир қалин дўстлармиз, десак, адашмаган бўламан.

«Насаф»даги йилларим фаолиятимда бурилиш ясагани рост. Бу ерда мен ўзимни топдим. «Аждарлар» сафида ўз ишлаш методикамни топдим. Ишга ёндашувим ўзгарди. Мураббий сифатида улғайдим. 6-7 йил иш услубим борасида изланиш олиб борган бўлсам, айнан «Насаф»да ўйлаган барча нарсамни амалга оширдим.

«Насаф»да ҳеч қачон оддий машғулот ўтказмаганман. Ҳар бир машғулотимга тайёрланиб борганман. Ҳар сафар янгича ёндашув билан йигитларни зериктириб қўймасликка ҳаракат қилдим. Киперларнинг қайси хислатини ривожлантириш борасида иш олиб бориш керак, яна қайси аспектларда оқсаётганимиз ҳақида бош қотирдим. Шу боис, ушбу клубдан абадий қарздорман.

- Бундан 6 йил илгари сиз Рўзиқул Бердиевни Вадим Абрамовдан кучлироқ эканлиги ҳақида айтган эдингиз. Мана орадан йиллар ўтди. Ҳозир Вадим Карленовичнинг штабида фаолият олиб боряпсиз. Абрамов ёки Бердиев?

- Жуда ҳам провокацион савол бўлди. Тўғриси, нима деб жавоб беришни ҳам билмайман. «Насаф» ҳозир ҳам менинг уйим. «Пахтакор»да ишлаб юрган пайтларим «Насаф»га меҳмонга ташриф буюрдик. Мени жуда илиқ кутиб олишди. Хатто, клуб базасидаги хонамда тунаб қолишимни илтимос қилишди. «Шерлар» аъзоси бўлганим учун таклифни рад этдим. Ўйлашимча, ҳали-ҳамон клуб билан илиқ хотиралар мени боғлаб туради. Шундай экан, танловни «Насаф» фойдасига ҳал этаман. Рўзиқул Бердиев мен учун маъқулроқ мураббий.

- «Пахтакор» ўзига сарфланган пулларга яраша натижа кўрсата олдими?

- Тошкент клуби сўнгги йилларда ўзбек футболи ривожи учун улкан ҳисса қўшгани бор гап. Ички биринчиликдаги барча совринларни ютиб олишди. Ажойиб кадрлар етиштиришди, бироқ сарфланган пуллар ҳақида сўз борар экан, натижа биринчи ўринга кўтарилади. Ўйлашимча, «Пахтакор» ўзига сарфланган пулларни оқлагани ёки оқлай олмаганини ОЧЛдаги ўйинлари билан кўрсатиб берди.

Саудия Арабистони, Қатар, Эрон ва БАА сингари мамлакат терма жамоалари ва клубларини биз бемалол мағлуб этар эдик. Солиштириш мақсадида Жанубий Корея ёки Япония терма жамоаларини танладим. Бундан 10-15 йил илгари биз араб футболчиларидан бир бош баланд эдик. Ҳозир уларнинг барчаси бизга ноқулайлик туғдирмоқда.

Улар футболга тикилган пуллар орқали ривожланишга интилмоқда. Хорижлик кучли мутахассисларни ишга таклиф этишмоқда. Бизда ҳам олға қадам ташлашга уриниш бўлмоқда, аммо сув остидаги оқим бошқа томонга оқизиб кетяпти, шекилли. Балки, қандайдир муаммолар бордир. Афсуски, кутилганидек ўсиш бизда кузатилмаяпти. Мустақил бўлганимизга 30 йил бўлди. Мен одамларни тушунаман. Оддий инсонлар буни кутмоқда. Ўзбекистонинг деярли барча вилоятларида бўлганман. Мен халқимиз оиласини боқиш учун қанчалар оғир меҳнат қилаётганини яхши биламан. Чироқ, газ ва бошқа муаммоларга дуч келсада, курашда давом этаётганидан хабарим бор. Шунга қарамай, чекка-чекка қишлоқдаги инсонлар футболга ташриф буюрса, кўзлари ёниб кетади. Уларнинг шаштини кўриб этларим жимирлаб кетади. Айнан шунақа мухлислар учун ҳам чиройли футбол кўрсатиш шарт.

«Пахтакор»нинг натижалари билан баҳолайдиган бўлсак, менимча бу имконият билан бундан кўпроғини амалга ошириш мумкин эди. Ҳар ҳолда, барча клубдан ички эмас, халқаро аренадаги зафарли юришларни кутгани рост.