Бешта клуб Холанднинг ишорасини кутяпти

«Манчестер Сити» ҳужумчиси Эрлинг Холанд атрофидаги трансфер қизиқиши яна кучаймоқда.

Fichajes нашрининг ёзишича, мадридлик «Реал» ва «Барселона» норвегиялик форвардни қўлга киритиш ғоясидан ҳали ҳам воз кечмаган. Каталония ва Испания пойтахти клублари Холандни келгуси йилларда жамоани етаклайдиган асосий фигура сифатида кўришмоқда.

Эрлингга бўлган қизиқиш фақат Испания грандалари билан чекланмайди. Манбага кўра, Лондоннинг «Арсенал» клуби, шунингдек, Германия чемпиони «Бавария» ва Франциянинг етакчи жамоаси «Пари Сен-Жермен» ҳам уни ўз сафида кўришни истамоқда.

Жорий мавсумда 26 ёшли Холанд барча мусобақалар доирасида 7 ўйинда майдонга тушиб, рақиб дарвозасини 7 марта ишғол этди. У шундай тарзда яна бир бор дунёдаги энг самарали ҳужумчилардан бири эканини исботламоқда.

Норвегия терма жамоаси юлдузининг «Манчестер Сити» билан амалдаги шартномаси 2034 йилгача мўлжалланган. Transfermarkt портали футболчининг бозор қийматини 220 миллион евро атрофида баҳоламоқда.