Биринчи истеъфо: Бош мураббий ишдан ҳайдалди

Германия Бундеслигасида 2026/2027 йилги мавсумда илк мураббий истеъфоси қайд этилди. Мёнхенгладбахнинг «Боруссия» клуби Ойген Полански эндиликда жамоа бош мураббийи эмаслигини маълум қилди.

Полански истеъфоси «Фрайбург» меҳмонида 0:5 ҳисобида мағлубиятга учраганидан бир кун ўтиб эълон қилинди. «Боруссия» ҳозирча Бундеслига жадвалида сўнгги ўринни эгаллаб турибди – жамоа ҳали бирор очко қўлга киритмаган.

Ойген Полански ўтган йил ноябрида «Боруссия»нинг бош мураббийи этиб тайинланган эди. Ундан аввал у жамоанинг вақтинчалик бош мураббийи сифатида ишлаган, ундан олдин эса клубнинг ёшлар ва ўсмирлар жамоаларида мураббийлик қилган.

Мёнхенгладбахнинг «Боруссия» клуби навбатдаги учрашувини 19 сентябрь куни ўз майдонида «Майнц»га қарши ўтказади.