Бизга Роналду керак эмас!

Яқинда Европа матбуотида “Ан-Наср”да ўйнаётган Криштиану Роналду Европага қайтиши ва “Пари Сен-Жермен” португалиялик юлдузни ўз сафига қўшиб олиши ҳақида маълумотлар тарқатилган эди.

Бу бежиз эмас, албатта. Манбаларга кўра, Криштиану Роналду 2026 йилги жаҳон чемпионати олдидан Европада тўп тепиб, спорт формасини янада юқори кўтаришни мақсад қилган.

Қолаверса, 39 ёшли футболчининг клубда ҳам, терма жамоа учун ҳам тинимсиз гол ураётгани унинг ҳар қандай клубни кучайтира олишидан далолат беради.

Бироқ, сўнгги маълумотларга қараганда, ПСЖ Роналдуни клубга олиб келадиган ҳар қандай эшикларни ёпади. Уларга португалиялик юлдузнинг ўзи ҳам, хизмати ҳам қизиқ эмас.

Нуфузли манбалардан fichajes.net сайтининг ёзишича, Париж клуби асосан ёшлардан таркиб топган янги лойиҳани амалга оширишни мақсад қилган ва ҳар қандай ҳолатда ҳам  ёши катта юлдузларга шартнома таклиф қилинмайди.