Бокс мухлисларининг бир кемтик кўнгли бор

Маълумки, ўзбек бокси жаҳонда ўз ўрнига эга бўлган мактабга ва куч-қудратга эга. Айниқса, сўнгги йилларда боксчиларимиз қайд этаётган фантастик натижалар миллионлаб мухлисларимизни хушнуд этиб келмоқда. Масалан, 2016 йили Рио-де-Жанейрода ўтган Олимпия ўйинларида боксчиларимиз 3 та олтин, 2 тадан кумуш ҳамда бронза медаллари билан умумжамоа бўйича биринчи ўринни қўлга киритишди. Бундай муваффақиятли иштирок кейинги йил Осиё чемпионатида жамғарилган 9 та олтин, жаҳон чемпионатида эса 1 та олтин, 3 та кумуш ва 2 та бронза медаллари билан давом этди. Ўтган йили Индонезияда ўтган Осиё ўйинлари ва бу йилги қитъа чемпионатида ҳам боксчиларимиз “сариқ қитъа”да тенгсиз эканликларини яна бир карра исботлашди. Ҳаваскорликдан профессионал боксга ўтган Шаҳрам Ғиёсов, Исроил Мадримов, Элнур Абдураимов, Муроджон Аҳмадалиев, Баҳодир Жалолов ва бошқа вакилларимизнинг иштироки таҳсинга сазовордир.

Бокс дунёсида WSB (World Series of Boxing) мусобақаси ҳам борки, унда етакчи мамлакат вакиллари бир жамоа бўлиб иштирок этишади. Бунда терма жамоа шарафини “Uzbek tigers” ҳимоя қилишидан хабарингиз бор. Жамоада юртимизнинг энг кучли боксчилари жам бўлишган, аммо мана шу турнир доирасида сира омадимиз келмайди!

Хўш, бунга сабаб нима?

 Аввало, мусобақанинг ўтказилиш тизими юқоридаги турнирлардан фарқ қилади. WSBда 10 та вазн тоифаси амал қилади ва унда жамоалар иккига бўлиниб, худди футболдагидек уй-сафар тизимида баҳс ўтказишади. Шу ўринда раҳматли сўз устаси Ҳожибой Тожибоевнинг бир жумласи ёдингизга келади: “Кўз тегмасин, чет элнинг терма жамоалари келса, бизникилар энасини кўрсатиб юборяпти. Лекин ўзлари четга чиқса, энасини кўриб қайтиб келяпти-да”. Ҳақиқатдан ҳам сафарда ўтадиган беллашувлар ҳамма спорт турида қийин. Шу жумладан, боксда ҳам. Бунда аввало рақибларнинг мухлислари олдидаги руҳий устунлигидан ташқари ҳакамлар принципи ҳам бор. Сафардаги баҳсларда реферилар мезбон боксчиларга шу қадар ёнбосишадики, ҳар қандай асаби мустаҳкам мухлис ҳам ўзини тута олмайди. Ўз навбатида, таниқли боксчиларимиздан бири (исми сир тутилмоқда) ушбу мусобақадаги сафар баҳсларини кўпчилик ёмон кўришини, адолатсизликлардан барча хуноб бўлишини айтиб ўтган.

Авваллари ёз фаслига келиб мусобақанинг финалчилари номи аниқ бўлар эди. Бу йил эса ҳатто қайси жамоалар иштирок этиши ҳали аниқ эмас. “Uzbek tigers” иштироки ҳам сўроқ остида турибди. Умуман олганда, мусобақанинг ортга сурилиши бокс дунёсида бўлиб ўтаётган ўзгаришларга ҳам боғлиқ. Маълумки, AIBA (Халқаро ҳаваскор боксчилар ташкилоти)да раҳбарият ўзгарди. Кейинчалик бу ташкилотнинг Олимпиадада бокс беллашувларига аралашмаслиги борасидаги янгиликлар пайдо бўлди. Шундай экан, биз мухлислар вазият юмшагунча жим кутиб турамиз. Ҳозир бокс оламида сиёсат ва бизнес тўқнаш келган пайт бундан бошқа чорамиз ҳам йўқ.

Бу йилги WSB мусобақасида қатнашсак . . .

Бу мавсум учун танланадиган таркибимиз аввалгиларига қараганда бироз пастроқ бўлиши кутилмоқда. Биз шу пайтгача кўрган ва бироз аввал санаб ўтган боксчиларимиз катта эҳтимолда иштирок этишмайди. Уларнинг ўрни терма жамоада босилар, бироқ Исроил Мадримов ва Баҳодир Жалоловнинг вазн тоифаларида катта муаммо бор. Уларнинг ўрнини боса оладиган ва халқаро майдондаги тажрибаси кўп бўлган вакилларимиз кам, лекин биз боксчиларимизга ишонамиз.

 2012 йил Аббос Атоевнинг меҳнатлари билан Лондон Олимпиадасида боксда атиги 1 та медаль олдик. Шундан кейин Атоев боксдан кетгач, энди Риода қайси спортчимизга ишонамиз, деган фикр ўтган эди. Шунга қарамасдан, федерациянинг тизимли ишлари самарасида юлдузли авлодни ўзимиз учун кашф қилдик. Бу авлодимиз профессионал боксга ўтиб кетганида уларнинг ўрнини боса оладиган боксчиларимиз йўқ эмас, албатта. Шу қаҳрамонларимизни кашф қилган мураббийларимиз ҳамон терма жамоада ишлар экан, уларданда кучли авлодни етиштириб беришларига ишонамиз. Фақат бунинг учун бироз вақт керак.

WSB сайтининг маълум қилишича, мусобақа октябрь ойида старт олади. Мавсум жуда ҳам оғир. Халқаро Олимпия қўмитасининг махсус гуруҳи томонидан жаҳон чемпионатига йўлланма берувчи мусобақалар ишлаб чиқилиши ҳамда жаҳон чемпионати форматига ҳам аниқлик киритилиши керак. Умид қилардикки, бизнинг боксчиларимиз ҳам мана шу турнирда ҳам зафар қучиб, бокс мухлисларининг кемтик бир кўнглини тўлдириб беришса.

 Мафтуна ЖЎРАЕВА
ЎзДЖТУ талабаси