Bo‘ldi, “Barsa”dan ketaman!

“Barselona” asosiy darvozaboni Mark-Andre ter Shtegen og‘ir jarohat olganidan keyin klub rahbariyati faoliyati yakunlagan Voytsex Shchesnini o‘z safiga qo‘shib olgani zaxiradagi posbon Inyaki Penyaning kelajagiga ta’sir o‘tkazdi.

25 yoshli   Penya ichki raqobatda polshalik mashhur golkiperga imkoniyatni boy berdi. Buning ortidan bosh murabbiy Xans-Diter Flik bilan munosabati buzildi.

Ekspertlar Penyaning Kataloniya klubidagi kelajagi barbod bo‘lganini ta’kidlamoqda. Shu bois, Inyaki yozda katta ehtimol bilan boshqa jamoaga o‘tishga harakat qilishi aytilmoqda.

Ayrim manbalar Inyaki Penya Turkiya chempionati etakchisi “Galatasaroy”ga o‘tishi mumkinligini ta’kidlamoqda. Istanbulliklar tajribali posbon Fernando Musleraga munosib o‘rinbosar qidiryapti.

Muslera o‘n yildan ortiq vaqt mobaynida “Galatasaroy” darvozasini qo‘riqladi va 2025 yilning yozida shartnomasi tugaganidan keyin Urugvayga qaytib ketib, o‘z yurtida faoliyat yuritmoqchi.

“Galatasaroy” Inyaki Penyaga begona emas. Ispaniyalik golkiper 2022 yilning birinchi yarmida bu jamoada ijarada o‘ynagan.