«Боруссия» Беллингамга мурожаат қилди

2026 йилги жаҳон чемпионати чорак финалида Англия терма жамоаси қўшимча дақиқаларда Норвегияни 2:1 ҳисобида мағлуб этди. «Уч шерлар» таркибидаги ҳар икки гол муаллифи ярим ҳимоячи Жуд Беллингем бўлди. Унинг ажойиб ўйини ва дублини собиқ жамоаси – Дортмунднинг «Боруссия»си ҳам эътироф этди.

«Жуд, табриклаймиз. Бу байрамона ҳаракатни биз Дортмунддаёқ кўрганмиз», – дея ёзди немис клуби ижтимоий тармоқлардаги саҳифасида.

Ушбу ғалабадан сўнг англияликлар мундиал ярим финалига йўл олди. Энди улар амалдаги жаҳон чемпиони – Аргентинага қарши майдонга тушади. Учрашув чоршанба, 15 июль куни бўлиб ўтади. 

Ярим финалнинг иккинчи жуфтлигида эса Франция ва Испания терма жамоалари ўзаро куч синашади.